Qytetarët serbë të veriut të Kosovës janë shprehur të gatshëm të marrin pjesë në votimin për largimin e kryetarëve shqiptarë të katër komunave veriore që do të mbahet më 21 prill.
Ata gjatë një bashkëbisedimi për KosovaPress, kanë thënë se vendimi i KQZ-së për organizimin e votimit është i drejtë, ndërsa u shprehën të bindur se procesi do të jetë i suksesshëm, sepse pjesa më e madhe e tyre do të dalin në këto votime.
Mirosllav Llaketiq, pensionist nga veriu i Mitrovicës, tha se ka qenë gabim bojkotimi i zgjedhjeve nga ana e qytetarëve të veriut dhe se tani ata janë vetëdijesuar.
Gordana Vllajiq, qytetare nga veriu i Mitrovicës, bëri të ditur se do të votojë më 21 prill për largimin e kryetarit të veriut të Mitrovicës. Sipas saj, suksesi i këtij procesi varet nga marrëveshja në mes të politikanëve të Kosovës dhe Serbisë, por nuk ka përmendur emra konkretë.
Edhe Savo Dragoviq, një qytetar tjetër nga kjo pjesë e Mitrovicës, tha se do të dëshironte shumë që në këto votime të dalin më shumë se gjysma e qytetarëve me të drejtë vote, në mënyrë që ky proces të jetë i suksesshëm.
Në anën tjetër, analisti serb i cili jeton në veri, Branisllav Kërstiq, vendimin për mbajtjen e votimit e ka quajtur ofertë pozitive për komunitetin serb të veriut. Sipas tij, mundësia e votimit përmes postës është faktor shumë i rëndësishëm për serbët, sepse duke pasur parasysh largimin e një numri të konsiderueshëm të tyre nga Kosova, nuk do të arrihej numri i nevojshëm 50 përqind plus një votë, sidomos në Mitrovicën Veriore dhe Zubin Potok. Ai potencoi se pjesa më e madhe e qytetarëve serbë në veri, tashmë e kanë kuptuar realitetin e ri në Kosovë dhe do të dalin në votimet e 21 prillit.
Ndryshe, për largimin e kryetarëve të komunave në veri të vendit do të duhen 50 përqind plus një votë e qytetarëve dhe në rast të plotësimit të këtij numri, do të konsiderohet se kryetarët e komunave janë larguar nga funksioni i tyre.