• Lajmi
  • KosovaPress, 14 Shtator 2012 12:28

Thaçi premton komunën e Mitrovicës veriore

prev next
 
Të ngjajshëm

Konferenca e Tretë Ndërkombëtare për Vetëqeverisjen Lokale “Forcimi i Qeverisjes Lokale Përmes Promovimit të Vlerave Evropiane”, ka mbledhur një numër të madh të zyrtarëve të lartë vendorë, rajonalë dhe ndërkombëtarë. Qëllimi i kësaj konference është promovimi i të drejtave të autoriteteve lokale në pajtim me kartën evropiane për vetëqeverisje lokale. Kryeministri i vendit, Hashim Thaçi duke folur për integrimin e komuniteteve në shoqërinë kosovare përmes decentralizimit, ka thënë se ky proces ka sfida duke përmendur krijimin e komunës së Mitrovicës veriore, por ka shprehur besimin që një gjë e tillë do të ndodh.

Kjo konferencë është organizuar për të tretën herë me radhë nga Ministria e Administrimit të Pushtetit Lokal. Në këtë konferencë u fol për rëndësinë e forcimit të komunave duke promovuar vlerat Evropiane.

Shefi i Qeverisë, Hashim Thaçi ka thënë se Republika e Kosovës ka përmbyllur me sukses mbikëqyrjen e pavarësisë. Sipas tij, përmbyllja me sukses i këtij procesi është i një rëndësie të veçantë dhe historike, posaçërisht për Republikën e Kosovës si shtet i ri i ndërtuar mbi bazën e shumetnicitetit me përkushtim maksimal ndaj respektimit të drejtave të të gjitha komuniteteve që jetojnë në Kosovë.

Për më tepër, ai ka shtuar se pjesë e pandashme e projektit të shtet ndërtimit dhe të vizionit të Kosovës shumetnike ka qenë suksesi i decentralizimit i cili ka arritur qëllimin e tij për pjesëmarrje të qytetarëve në vendimmarrje që është element thelbësor i demokracisë.

Që nga viti 2008, procesi i reformës i pushtetit vendor dhe decentralizimi në Kosovë ka përfshirë ligje të reja, rishikimin e tyre ekzistues, krijimin e komunave të reja.

Kryeministri ka thënë se tani që është krijuar një sistem solid të qeverisjes lokale, është arritur të sigurohen kushte të mira për gjithë qytetarët, por siç ka thënë ai, mund të avancohen edhe më shumë në këtë proces me anë të ngritjes së kapaciteteve të resurseve njerëzore, financimit të projekteve infrastrukturore si dhe koordinimin me faktor të jashtëm dhe të brendshëm.

Por, ai ka përmendur edhe sfidat që i ka Kosova, siç është krijimi i Mitrovicës veriore, i cili edhe pse nuk ka përmendur ndonjë datë se kur do të krijohet kjo komunë, ai ka shprehur besimin që një gjë e tillë do të ndodh.

“Sidoqoftë edhe në këtë proces të gjithë e dimë se kemi sfida të tjera. Pra krijimin e komunës së Mitrovicës veriore, por kam besim se edhe kjo komunë do të krijohet shpejt dhe gjithmonë duke pasur edhe suksesin e integrimit të komunitetit në veçanti të komunitetit serb në jug, por edhe komuniteteve tjera në përgjithësi. Një sfidë tjetër që duhet të adresojmë në të ardhmen e afërt është komunikimi i institucioneve të Kosovës me komunitetin në veri. Prandaj Qeveria e Republikës së Kosovës në maj të këtij viti ka hapur Zyrën Administrative në veri të Mitrovicës”, ka thënë kryeministri.

Ai ka shtuar se kjo zyrë është e përkushtuar që të ofroj të gjithë shërbimet publike që të përmirësoj kualitetin e jetës për qytetarët në mënyrë transparente dhe shumë të përgjegjshme.

Për më tepër, ai ka shtuar se kjo zyrë jo vetëm që ofron shërbime lokale, por siguron se parimet e decentralizimit dhe qeverisjes lokale të përdoren në praktikë edhe në këtë pjesë të Republikës së Kosovës.

Nga ana tjetër, Samuel Zhbogar, përfaqësues i BE-së në Kosovë, tha se do të vazhdoj të mbështes tutje perspektiven evropiane të Kosovës, duke shtuar se dhe qeverisja e mirë këtu është nocioni kryesor.

Por, ai ka kërkuar që qeveritë lokale të jenë më të fuqishme, në mënyrë që të ofrohen të gjithë qytetarëve shërbime më të mira.

“Ne do të kërkojmë jo vetëm vlera të fuqishme evropiane në legjislacionin në qeverisjen lokale, por edhe për qeveritë lokale që të jenë më të fuqishme, e shëndosh dhe e aftë të ofroj shërbime në fshatra, qytete. Qeverisja lokale ka të bëjë me përmbushjen e kërkesave të qytetarëve shumë thjeshtë nevojën për shkolla të mira, për shërbime të mira shëndetësore, për mbledhjen e duhur të mbeturina, pastaj rregullimin mjedisor, rregullimin e ndërtesave, rregullimin e punësimit, qasjen në dokumente që ka nevojë etj”, ka theksuar Zhbogar.

Ai ka dhënë edhe një mesazh, që sipas tij pushteti lokal të jap liri, të drejt edhe përgjegjësi këshilltarëve të zgjedhur lokal, pasi kjo është vlerë evropiane dhe ata duhet të i shërbejnë popullit.

Mbështetje për zhvillim të qeverisjes lokale dha edhe ambasadorja amerikane, Tracy Jackobson, i cila tha se qytetarët duhet të involvohen më shumë dhe të dëgjohet zëri i tyre.

“Përmes USAID do të punohet që qytetarët të involvohen në planifikimin e buxhet planeve, dhe të sigurohemi që zëri i qytetarëve po dëgjohet kur komunat hartojnë prioritetet”, ka theksuar Jackobson.

Ndërkohë ministri i pushtetit lokal, Sllobodan Petrviq tha se decentralizmi ka ndikuar në krijimin e komunave të reja, si dhe krijimin e Zyrës Administrative në veri të Mitrovicës.

“Decentralizimi ka ndikuar që të formohen komuna të reja në Kosovë, qeveria po bën përpjekje edhe për formimin e komunës së veriut të Mitrovicës dhe procesi rezultoi pozitivisht në themelimin e zyrës administrative në veri të Mitrovicës. Pavarësisht rrethanave dhe marrëdhënieve të komplikuara politike ne këtë pjesë, kjo zyre po jep rezultate dhe i duhet kohë derisa të rritet inkuadrimi i qytetarëve nga pjesa veriore e Kosovës", tha Petroviq.

Kjo konferencë me temën “Forcimi i qeverisjes lokale përmes promovimit të vlerave Evropiane”, do të mbahet për dy ditë rresht në Prishtinë. Në kuadër të konferencës do të organizohet edhe Panairi i Komunave.