Të premten, pjesa e parë

prev next
 
Prishtinë E mërkurë, 13 Shkurt 2013 12:07

Përbërja e kryesisë së re prej 25 anëtarësh, e Partisë Demokratike të Kosovës, pritet të dihet para festës së pesë vjetorit të pavarësisë së vendit, respektivisht këtë të premte, ndërkohë që zgjedhja e strukturës drejtuese përbrenda saj, mbetet për javën tjetër. Në përbërje të kësaj kryesie, ende përmenden si emra me gjasa të mëdha për t’u zgjedhur edhe ish-sekretari i përgjithshëm i kësaj partie, Jakup Krasniqi dhe nënkryetari i saj, Fatmir Limaj. I pari nuk pati marrë pjesë në zgjedhjet e fundit dhe as në Kuvendin e VI zgjedhor ndërkohë që i dyti, për shkak se vazhdon të mbahet ende në arrest, nuk ka mundur të marrë pjesë në këtë proces zgjedhor.

Burime, brenda PDK-së, kanë thënë për Kosovapress, se të premten do të dihen 27 emrat, të cilët më pastaj do të mund ta zgjedhin kryesinë e re të PDK-së.

“Të premten sigurt që do të zgjidhet anëtarësia e re dhe më pas ka gjasë që edhe kryesia të zgjidhet”, ka thënë burimi në fjalë.

I pyetur se kush do të mund të zë postin e Sekretarit të Përgjithshëm të PDK-së, i njëjti ka thënë se ka gjasë që ky post të hiqet krejt.

“Të shohim! Ndoshta e heqim krejt postin e Sekretarit të Përgjithshëm, se dojmë me ofruar diçka të re në vend”, ka thënë ai.

Megjithatë i përfoluri për këtë post, nënkryetari aktual i PDK-së, Hajredin Kuçi, gjatë një interviste në RTK, ka thënë se ka respekt të vacant për Jakup Krasniqin, duke treguar se nuk e pretendon postin e deritanishëm të Krasniqit, si Sekretar i Përgjithshëm i partisë.

Sipas tij, mungesa e Fatmir Limajt në Kongres, për arsye objektive, dhe e Jakup Krasniqit e ka zbehur kongresin.

Edhe ai ka pranuar që së shpejti do të zgjidhet Kryesia e re, e cila, për Kuçi, do të duhet të ishte 70 për qind me përbërje të vjetër.

E kur jemi te përbërja e kryesisë së re, burim ynë, ka thënë se mund të jenë disa nga njerëzit që kanë qenë deri më tash, siç janë Hajredin Kuçi, Enver Hoxhaj dhe ndoshta edhe Fatmir Limajn, por nuk përjashtohet se Adem Grabovci, si njëri nga nënkryetarët e kësaj partie.

Përzgjedhjen e anëtarësisë së re, para pesë vjetorit të pavarësisë së vendit, e ka konfirmuar për Kosovapress edhe Koordinatori i kësaj partie për zgjedhjet e brendshme, Basri Musëmurati, i cili ka thënë se kah fundi i javës mund të zgjedhet anëtarësia e re por jo kryesia.

“Ende nuk kemi mundur me i kryer do të punë rreth atyre njerëzve, rreth 150, me i marr të dhëna krejt, por besoj që ka fundi i javës së ardhshme mundemi me i kryer”, ka thënë ai.

Musëmurati ka thënë se është duke u punuar në verifikimin e listës së anëtarëve të Këshillit Drejtues, duke mohuar se ka probleme apo pakënaqësi.

Koordinatori beson se nëse kandidohen edhe Jakup Krasniqi edhe Fatmir Limaj do të mund të bëhen pjesë e Kryesisë së re.

Edhe bashkë partiaku i tij, Adem Grabovci ka mohuar që ka ndonjë përçarje në këtë subjekt politik.

“Ky proces ka dëshmuar një vlerë të veçantë, por ka dëshmuar gjithsesi vlerat që ka PDK-ja, sepse është procesi më i rëndë më i vështirë për çdo subjekt politik. Normalisht se çdo subjekt politik kur hynë në proceset e brendshme zgjedhore është shumë normale nga ky proces dalin edhe njerëzit e pakënaqur, por është me rëndësi që ato pakënaqësi të mos jenë të asaj përmase që të dëmtojnë unitetin e subjektit politik dhe në PDK në mënyrë absolute nuk ka ndodhur diçka e tillë, sepse është respektuar vullneti dhe vota e çdo aktivisti të PDK-së. Të gjithëve është dhënë mundësia që të zgjedhin, ndërsa vota është ajo që ka përcaktuar se kush do të jetë në organin më të lartë të Këshillit Drejtues të PDK-së”, ka theksuar Grabovci.

Ndryshe, kryetari i PDK-së, Hashim Thaçi pritet që listën prej 25-anëtarësh t’ia propozojë Këshillit Drejtues për Kryesinë e re, më pas Këshilli do të vendos për këtë. /Kosovapress/

 
 
 
comments powered by Disqus
 
 
 
 
 

Ju rekomandojmë