• Lajmi
  • KosovaPress, 23 Prill 2012 15:56

ANP, memorandum për sigurinë e aviacionit civil

prev next
 
Të ngjajshëm

Me qëllim të përmirësimit të vazhdueshëm të sigurisë së aviacionit civil, promovimin e sigurisë dhe mbajtjen e besimit të publikut në sigurinë e aviacionit civil, Aeroporti Ndërkombëtar i Prishtinës “Adem Jashari”, ka nënshkruar memorandum mirëkuptimi me Komisionin për Hetimin e Aksidenteve dhe Incidenteve Aeronautike të Republikës së Kosovës (KHAIA).

Memorandumi përcakton mënyrën e bashkëpunimit midis KHAIA-as dhe ANP “Adem Jashari”, me qëllim të garantimi të vazhdueshëm të sigurisë së aviacionit civil dhe hetimit adekuat të aksidenteve dhe incidenteve në Aviacionin Civil në Kosovë.

Me rastin e nënshkrimit të memorandumit ne mes palëve, përkatësisht kryeshefit ekzekutiv të ANP-së, Bahri Nuredini, dhe kryetarit të KHAIA-së Kreshnik Gashi, u theksua si mjaft i rëndësishëm ky memorandum dhe në përputhje me Ligjin për Aviacionin Civil, Konventën për Aviacionin Civil Ndërkombëtar, Marrëveshjen për Themelimin e Hapësirës së Përbashkët Evropiane të Aviacionit dhe parimet e acquis communuitare të BE-së, të cilat janë të aplikueshme për sigurinë e aviacionit civilë në Kosovë.

Ky memorandum mirëkuptimi ka për qëllim ngritjen e bashkëpunimit në mes të ANP “Adem Jashari” dhe KHAIA-së, në kuadër të fushëveprimit dhe kompetencave të përcaktuara me ligj, të cilat paraqesin interes të përbashkët.

Me këtë memorandum, ANP “Adem Jashari”, edhe njëherë dëshmon përkushtimin e menaxhmentit për ngritjen e sigurisë në fushën e aviacionit civil dhe ofrimin e shërbimeve sa më cilësore me qëllim të mbajtjes së besimit të publikut në sigurinë e aviacionit civil./Kosovapress/