Me strategji kundër tuberkulozit

prev next
 
Prishtinë E premte, 23 Mars 2012 14:09

Ministri i Shëndetësisë, Ferid Agani, me rastin e Ditës Botërore të Tuberkulozit ka dhënë zotimet e tij se do ta përkrah Klinikën e Pulmologjisë, por edhe institucionet e tjera shëndetësore në fuqizimin e luftës kundër tuberkulozit. Gjithashtu me rastin e Ditës Botërore të Tuberkulozit, është bërë edhe promovimi i Strategjisë për kontrollin dhe mbrojtjen nga tuberkulozi. Agani ka falënderuar profesionistët për sukseset në luftën kundër tuberkulozit, duke shtuar se angazhimet e mëtejme do të vazhdohet në partneritet me donatorët.

“Është ky një rast i mirë që të rekapitulojmë atë që është bërë në vitin e kaluar në ballafaqimin me këtë sëmundje e cila para disa dekadave e ka paraqit një barrë të rëndë dhe të papërballueshme për shëndetësinë tonë, ndërsa sot është duke u shndërruar në një problem shëndetësor i cili me një qasje gjithëpërfshirëse të përbashkët është e mundur që të menaxhohet ”, ka thënë ai

Skënder Syla, shef i zyrës së OBSH-së në Kosovë, ka theksuar faktin se tuberkulozi edhe sot e kësaj dite vazhdon të mbetët kërcënim serioz për shëndetin publik global. Sipas tij, nga tuberkulozi çdo vit në botë vdesin 1.5 milion njerëz, apo rreth 3800 persona në ditë, por ai tregon se as rajoni i Evropës nuk bën përjashtim në këtë aspekt, pasi që përllogaritjet tregojnë se çdo vit regjistrohen rreth 418 mijë raste të reja të tuberkulozit dhe rreth 60 mijë vdekje në Evropë.

“Një problem kërcënues dhe problem serioz për shëndetin publik këtyre viteve të fundit paraqesin format e tuberkulozit rezistent në trajtim dhe atyre formave skajshmërisht rezistente në trajtim. Kjo vjen si pasojë e kapaciteteve kufizuese të vendeve anëtare në diagnostikimin të hershëm të këtyre rasteve”, ka thënë ai.

Rukije Mehmeti, menaxhere kombëtare për TB, ka bërë të ditur se në vendin tonë gjatë vitit 2011 janë regjistruar 846 raste me tuberkuloz apo 42 të sëmurë në 100 mijë banorë. Sipas saj, kjo tregon për një rënie të tuberkulozit krahasuar me vitet 2000.

Me këtë rast është promovuar edhe strategjia për kontrollin e tuberkulozit, mirëpo u kërkua që kjo strategji mos të mbetët vetëm në letër por të implementohet dhe të punohet në bazë të saj.

“Format konkrete të strategjisë janë që të përmbushen kërkesat e rezolutës së mijëvjeçarit që do të thotë se deri në vitin 2016, nga 44 incidenca e tuberkulozit të zbret në 33. Ne jemi në rrugëtim të drejtë për zvogëlimin e saj dhe njëkohësisht rezultatet e mjekimit të jenë mbi 85 për qind që ne i kemi mbi 90 për qind”, ka thënë ajo.

Tuberkulozi është një sëmundje ngjitëse që përhapet përmes ajrit, nga i sëmuri te personi i shëndoshë përmes, pështymës, teshtitjes dhe kollitjes. Shenjat e paraqitjes së tuberkulozit janë, plogështia dhe zbehja, humbja e oreksit, temperatura, djersitja gjatë natës, kollitja mbi tri javë dhe këlbaza me shenja të gjakut./Kosovapress/

 
 
 
comments powered by Disqus
 
 
 
 
 

Ju rekomandojmë