• Lajmi
  • KosovaPress, 24 Maj 2012 15:37

Dell mbështet hapjen e Zyrës Administrative (me video)

prev next
 
Të ngjajshëm

Ambasadori amerikan në Kosovë, Kristofer Dell, ka përshëndetur vendimin e Qeverisë së Republikës së Kosovës për hapjen e zyrës administrative në veri të Mitrovicës. Sipas tij, ky vendim i qeverisë demonstron edhe një herë përkushtimin e saj për mirëqenien e qytetarëve të vet pa marr parasysh përkatësinë etnike të tyre dhe përkushtimin e mëtejmë të Qeverisë së Kosovës që të vazhdojë më përmbushjen e Planit të Ahtisarit edhe pas përmbylljes së pavarësisë së mbikëqyrur në shtator të këtij viti.

Ambasadori Dell, këto komente i ka bërë të enjten, gjatë një vizite që bashkë me zëvendëskryeministrin Sllobodan Petroviç dhe kryetarin e Rahovecit Smajl Latifaj, i bëri fshatit Hoçë e Madhe.

I pyetur nga gazetarët, se a do të ketë sukses formimi nga Qeveria e Kosovës i zyrës administrative në veri të Mitrovicës, Dell është shprehur optimist, duke thënë se që nga korriku i vitit 2010, kur në Mitrovicën e veriut është hapur zyra për shërbime kanë qenë më shumë se 10 mijë qytetarë nga ajo anë të cilët i kanë marrë shërbimet e tyre dhe se 8 mijë prej tyre kanë qenë serbë.

“Jam shumë optimist, sepse mendoj se kjo demonstron edhe një herë përkushtimin e Qeverisë së Republikës së Kosovës për mirëqenien e qytetarëve të vet, pa marr parasysh përkatësinë etnike të tyre dhe përkushtimin e mëtejmë të qeverisë së Kosovës që të vazhdojë më përmbushjen e planit të Ahtisarit edhe pas përmbylljes së pavarësisë së mbikëqyrur në shtator të këtij viti, në mënyrë që të krijojë edhe mundësitë për hapjen e komunës së re atje dhe për zgjedhjet e mëvonshme”, ka thënë ai.

Dell, me këtë rast, ka folur edhe për incidentin e djeshëm në një fshat të Komunës së Klinës me ç’rast janë djegur dy shtëpi të serbëve, duke thënë se ky akt nuk do të ndikojë në kthimin e qëndrueshëm të serbëve në shtëpitë e tyre.

“Natyrisht që ka kushte për kthim të qëndrueshëm. Ne jemi këtu në një fshat i cili është në lulëzim e sipër ku po shohim popullatën e cila është duke punuar dhe duke vënë produktet e veta dhe po tregon se mund të jetohet prej tokës dhe prej verës, pra ka gjasa për kthim të qëndrueshëm. Ajo që është më e rëndësishmja është reagimi shumë i shpejt i qeverisë në nivelin komunal dhe në nivelin qendror dhe ata jo vetëm që janë shprehur që këto incidente janë të dënueshme, por po ashtu kanë ndarë edhe mjete që t’i ndërtojnë menjëherë shtëpitë atje”, ka thënë ai.

Ndryshe, djegien e dy shtëpive të dy familjeve të komunitetit serb në fshatin Dresnik të Klinës, e kanë dënuar të gjitha institucionet relevante dhe kanë kërkuar zbardhjen e rastit, duke kërkuar që kryesit e kësaj vepre të dalin para drejtësisë./Kosovapress/