• Lajmi
  • KosovaPress, 25 Prill 2012 13:14

BSPK dhe KSLK, bashkojnë forcat (video)

prev next
 
Të ngjajshëm

Bashkimi i Sindikatave të Pavarura të Kosovës (BSPK) dhe Konfederata e Sindikatave të Lira të Kosovës (KSLK), kanë nënshkruar një memorandum bashkëpunimi, për bashkim forcash dhe idesh, në mënyrë që sa më shumë të fuqizohet subjekti sindikal në Kosovë, karshi kërkesave për të drejtat që iu takojnë.

Haxhi Arifi, kryetar i BSPK-së tha se që nga tani, BSPK dhe KSLK, do të jenë në një shtëpi dhe në një logo dhe se do të jenë një forcë unike e sindikatës, e cila do t’i mbrojë të drejtat e punëtorëve dhe liritë sindikale. Arifi po ashtu pohoi se bashkëpunimi i konfederatave botërore të sindikatave me seli në Bruksel, ku dhe BSPK është anëtar që nga viti 2005, ka dhënë një kontribut jashtëzakonisht të madh, në ndihmën, organizimin, po ashtu edhe në finalizimin e kësaj marrëveshje.

Arifi beson se tani do të jenë një forcë shumë më e organizuar, duke pohuar se dyert e BSPK-së, janë të hapura për të gjithë, duke respektuar statutin e këtij subjekti dhe ligjet në fuqi, andaj duhet t’i bashkojnë forcat.

“Ne do të jemi në një shtëpi, që do të quhet Bashkim i Sindikatave. Normal ky memorandum bashkëpunimi, do të vazhdojë punën e vet ta finalizojmë. Për të gjitha sindikatat është dera e hapur. Do të vazhdojmë me të gjithë të bisedojmë, sepse ata të gjithë kanë qenë në këtë shtëpi dhe ne duam ta unifikojmë tërë forcën, e të gjitha federatave apo sindikatave të pavarura të Kosovës këtu”, pohoi Arifi.

Ndërsa Alush Sejdiu, nga KSLK, tha se qëllimi i tyre është përafrimi i qëndrimeve, në mënyrë që të kenë një bashkëpunim, pasi që interesi i të dy konfederatave është i njëjtë dhe se roli i sindikatës duhet të jetë në një nivel më të lartë dhe të ketë fuqi më të madhe të veprimit.

“Duke parë gjendjen e rëndë të punëtorisë në Kosovë, mendojmë që roli i sindikatës duhet të jetë në një nivel shumë më të lartë dhe të ketë një fuqi shumë më të madhe të veprimit. Ne do ta bëjmë hapin e parë, sot sigurisht që në ditët e ardhshme do t’i konkretizojmë edhe çështje tjera. Jam shumë i bindur se do të kemi sukses në këtë drejtim. Me këtë duam t’i japim një mesazh, të gjithë kolegëve sindikalistëve që t’i tejkalojnë vështirësitë momentale dhe interesat personale, të bashkohemi të gjithë për arsye se fundi i fundit edhe roli i sindikalistit është i tillë të jenë solidar të ketë bashkëpunim në mënyrë që zëri i tyre të jetë më i fuqishëm dhe të realizoj interesat e punëtorëve”, tha ai.

Edhe zëvendëssekretari i Sindikatave Botërore, Jaan Wienen tha se janë të kënaqur që po shohim bashkimin e dy sindikalistëve pas negociatave të gjata që kanë pasur, ku edhe kanë vendosur të bashkohen, në mënyrë që të jenë një sindikatë më e fuqishme. Ai po ashtu pohoi se që një kohë të gjatë ka përcjellë lëvizjet sindikale në Kosovë, ku ka pasur batica dhe zbatica. Megjithatë ai këto i quan tërësisht normale, në një shtet të lirë dhe në tranzicion, ku të gjithë përpiqen të gjejnë vetën në jetën sociale. Ky memorandum bashkëpunimi, sipas tij është një shembull i mirë, në bashkimin e forcave për të luftuar për një të ardhme me të mirë në Kosovë.

“Ky bashkim është bërë për shkak se të dy e kanë kuptuar se fuqizimi i sindikatave, është vetëm bashkimi. E dimë se Kosova është një shtet në tranzicion dhe ka shumë të rinj të papunësuar dhe problemi i papunësisë është mjaftë i madh në Kosovë. Një shtet i cili nuk ofron perspektive dhe punësim për të rinjtë, ai shtet nuk ka të ardhme. Ky bashkim sot, kontribuon që të kemi partnerë më të fortë social sindikatën, e cila në dialogun social me partnerët tjerë, lufton dukurinë e papunësisë, pasi që punësimi i të rinjve në të gjitha sferat e jetës, është një hap i rëndësishëm”, tha ai.

Ndërsa i pyetur për ndikimin e politikës në Sindikatat e punëtorëve, Wienen tha se puna e sindikalistëve lidhet me politikën, pasi që Qeveria i bien vendimet dhe sindikatat duhet të diskutojmë me ta për ligje dhe se vendime janë pjesë e punës sonë, mirëpo asnjëherë nuk pranojnë ndërhyrjen e tyre direkte në punën e sindikatës. Një nga principet themelore të tyre sipas tij është që sindikatat të jenë të pavarura nga politika. /Kosovapress/