Follow Us

*KYQU SQ EN
E Enjte, 22.02.2018 11:33

​Flet Albin Tahiri pas debutimit në LOD PyeongChang 2018: Ishte rezultat që e kam pritur (Foto-Video)

| 13/02/2018 12:54

Albin Tahiri ka debutuar në Lojërat Olimpike Dimërore PyeongChang 2018. Skitari ynë ka zënë vendin e 37-të nga 65 garues në disiplinën kombinim alpin.

Kjo pozitë vlerësohet e suksesshme, bazuar në kushtet që mbretëruan, sidomos në garën e sllallomit, ku shumë garues u diskualifikuan, duke mos arritur cakun.

Gara e parë ishte ajo e lëshimit. Qëllimi i tij ishte të mos diskualifikohej në debutim.28-vjeçari pati kohën 2:23.40 sekonda pas dy garave. Albin Tahiri është shprehur i kënaqur me pozitën që ka zënë.

“Unë jam vërtetë i lumtur me garën e lëshimit, përkundër disa gabimeve që bëra. Sllallomi ishte shumë i vështirë, shumë me akull, por ia dola të arrijë në cak dhe zënia e vendit 37 ishte rezultat që e kam pritur”, ka thënë Tahiri pas garës, njofton Komiteti Olimpik i Kosovës.

Në garën e lëshimit, Albini doli i 56-ti me kohë 1:23.84 sekonda. Trajneri i tij, Agim Pupovci, ishte i kënaqur me lëshimin, por jo edhe aq shumë me sllallom.

“Sot ishte gara e parë e Albinit në kombinim alpin, ka qenë një garë shumë e fortë. Terreni ishte i ngrirë prej katër ditësh, ku është punuar edhe me ingjeksion (mbushje me ujë). Në lëshim ka qenë shumë i mirë, rreth 4.60 sekonda larg vendit të parë, ku u plasua si i 55-ti, kurse në sllallom po ashtu ishte terreni shumë i vështirë, por pasi bëri dy gabime të forta, humbi shumë kohë dhe u plasua në vendin e 37-të prej 65 garuesve. Me lëshim jam i kënaqur, por me sllallom po të mos ishin këto dy gabimet e mëdha, do të ishte plasmani më i mirë”, tha Pupovci.

Pikërisht në lëshim do ta ketë garën e ardhshme, e cila mbahet të enjten (15 shkurt). Komiteti Olimpik i Kosovës përgëzon paraqitjen e Albin Tahirit, duke e uruar për paraqitjet në garat e ardhshme.


 

Shpërndaje


Artikuj të sponzorizuar

Më shumë nga KosovaPress