U inaugurua ferma Bio e pulave

prev next
 
Mitrovicë E premte, 26 Prill 2013 15:30

Në fshatin Frashër të komunës së Mitrovicës, sot është inauguruar ferma për prodhimin e pulave dhe vezëve Bio, që është pjesë e projektit të financuar nga Unioni Evropian me vlerë prej rreth 300 mijë euro dhe e implementuar nga OJQ “Diakonia” në partneritet me komunën e Mitrovicës. Në këtë ceremoni u tha se me ndihmën e Komisionit Evropian, po kontribuohet në krijimin e vendeve të reja të punës për grupe specifike si në këtë rast, që ky projekt ka në fokus personat me aftësi të kufizuar.

Ministri i Bujqësisë, Pylltarisë dhe Zhvillimit Rural (MBPZHR), Blerand Stavileci, ka thënë se nëpërmjet këtij projekti të organizatës “Diakonia” e cila është më meritorja për këtë biofermë dhe Simentalit, që është një racë e njohur për prodhimtarinë e kombinuar të mishit dhe qumështit, Maranit, (racë e njohur për prodhimtarinë e kombinuar të mishit dhe vezëve), i është bërë një shoqe në shpezëtari.

“Në këtë mënyrë zhvillojmë sektorin e bujqësisë dhe vetëm me mobilizimin e të gjithëve, pra të institucioneve, fermerëve, por në veçanti të organizatave donatore, e sidomos Komisionit Evropian, i cili po përkrah projekte konkrete me të cilat po kontribuon në zhvillimin e bujqësisë dhe ekonomisë në përgjithësi dhe po krijon në të njëjtën kohë vende të reja të punës për ata që kanë nevojë, por edhe për grupe specifike si në këtë rast që ky projekt ka në fokus personat me aftësi të kufizuar”, ka thënë Stavileci.

Ai ka pohuar se nga viti i kaluar, e në veçanti sivjet, sektorit të shpezërtarisë i kushtohet një vend i veçantë, sepse MBPZHR-ja sivjet përkrah financiarisht nëpërmjet granteve ndërtimin e fermave, renovimin e tyre, kështu që është një mundësi për fermerët gjithandej Kosovës përshirë Mitrovicën, për vazhdimin e suksesshëm të veprimtarisë të kësaj ferme bio.

Sipas tij, Mitrovica dhe dy qytete tjera kanë potencial të zhvillimit rural, andaj është bërë një projekt special që do të publikohet javën e ardhshme në mënyrë që të ofrojë edhe një mundësi shtesë fermerëve të kësaj ane për të fituar grante nga Ministria e Bujqësisë Pylltarisë dhe Zhvillimit Rural.

“Prandaj unë e shoh zhvillimin e këtij sektori vetëm në këtë mënyrë, që secili prej nesh brenda mandatit dhe funksionit që ushtron, ta bëjmë jo vetëm më të mirën e mundshme, por ndonjëherë edhe t’i tejkalojmë mundësitë tona, në mënyrë që ta përkrahim sektorin e bujqësisë, në këtë rast sektorin e shpezëtarisë dhe të gjithë sektorët tjerë. Këto janë e ardhmja ekonomike e vendit tonë, sepse e përmirësojmë cilësinë e jetesës në zonat rurale, i ngrisim të ardhurat e fermerëve, zëvendësojmë prodhimet e importit me prodhimet tona, rrisim potencialet eksportuese, si dhe mbajmë dhe krijojmë vende të reja të punës”, ka theksuar ministri Stavileci.

Kryetari i organizatës Diakonia Baumgarten, ka zbuluar një fshehtësi të kryetarit Kastrati gjatë vizitës zyrtare të tij në Gjermani.

“Kastrati viziton një bio fermë të Diakonisë në Trier dhe sheh socialzimin e njerëzve të hendikepuar duke punuar me njerëzit tjerë, punën e tyre me pula bio, etj. dhe më pyet mua si ka mundësi që diçka e tillë të krijohet edhe në Mitrovicë. Unë i kam thënë kryetarit se është e mundur por na mungojnë dy gjëra, toka dhe paraja. Ai është përgjigjur menjëherë pozitivisht dhe ka ndihmuar shumë në këtë drejtim dhe ja po e shihni rezultatin”, ka thënë, mes tjerash, Baumgarten.

I pari i qytetit të Mitrovicës, Avni Kastrati, në emër të qytetarëve ka falënderuar Diakoninë dhe ka shprehur kënaqësinë rreth këtij projekti, për të cilin ka thënë se është shembull për rajonin.

“Çdokush në jetë e ka një hobi, hobi im prej fëmijërisë ka qenë përkujdesja për shpezëtari, gjegjësisht për pula. Prandaj edhe në Gjermani unë kam shërbyer si këshilltar për projektin të cilin tash po e diskutojmë”, ka thënë mes tjerash Kastrati.

Ai ka potencuar zhvillimin, po ashtu, të një projekti tjetër që ka të bëjë me mbrojtjen e mjedisit, pastaj qendrën e kompetencës që është realizim i GIZ-it bashkë me Diakoninë, pastaj qendrën multietnike të të rinjve pranë Ibrit me donacione të Qeverisë gjermane, etj.

Në anën tjetër, përfaqësuesi i BE-së, Shtuk, u shpreh të jetë i lumtur që BE-ja, përmes këtij projekti, ka kontribuuar në zhvillimin ekonomik dhe punësimin e qytetarëve. /Kosovapress/

 
 
 
comments powered by Disqus