Trajkoviq kërkon lirimin e dy serbëve të arrestuar

prev next
 
Prishtinë E diel, 22 Prill 2012 18:30

Pas të ashtuquajturit ministrit serb për Kosovë, Goran Bogdanoviq, ka reaguar edhe deputetja e Listës së Bashkuar Serbe në Kuvendin e Kosovës, Rada Trajkoviq, e cila ka apeluar tek bashkësia ndërkombëtare që të ndikojë për t’u liruar nga arrestimi kreu i Rrethit të Kosovës, Goran Arsiq dhe sekretari i Kryqit të Kuq në Lipjan, Novica Zhiviq, të arrestuar një ditë e parë.

Goran Arsiq dhe Novica Zhiviq, janë arrestuar pas akuzave të ngritura nga disa qytetarë serbë në Lipjan, se po u bëjnë presion për t’i detyruar që të marrin pjesë në zgjedhjet serbe. Ata i kanë kërcënuar bashkëkombësit e tyre, se nëse nuk votojnë, do të arrestohen kur të hynë në territorin e Serbisë.

Trajkoviq në një deklaratë me shkrim që ua shpërndarë medieve ka theksuar se arrestimi i dy serbëve është vazhdim i aksionit të arrestimit pa shkak të serbëve në Kosovë, i cili ka për qëllim që të gjithë të tjerëve t’u çojë mesazhin se janë të padëshirueshëm në Kosovë.

"Kjo ndjekje e serbëve është ekskluzivisht e motivuar etnikisht dhe nuk mund t’i arsyetojë as deklaratat e rrejshme të dëshmitarëve dhe as arsyetimet absurde të Policisë së Kosovës”, ka thënë Trajkoviq.

Sipas saj, arrestimi i Arsiqit për shkak të agjitimit dhe kërcënimit të atyre që nuk kanë dëshiruar që të votojnë në zgjedhjet e pritshme serbe nuk është serioze, duke pasur parasysh se Arsiq publikisht dhe nëpërmjet medieve ka thirrur që të mos mbahen zgjedhjet lokale serbe në Kosovë.

Ajo ka thënë se serbët në Kosovë janë të shqetësuar deri në fund, për shkak se është evidente se në disa muajt e fundit ekziston një vazhdimësi e ndjekjes intensive të serbëve në Kosovë.

 
 
 
comments powered by Disqus
 
 
 
 
 

Ju rekomandojmë