Sektori privat zhvillon ekonominë në Kosovë

prev next
 
Prishtinë E martë, 05 Mars 2013 16:53

Ndihma e Shteteve të Bashkuara të Amerikës për ekonominë e Kosovës është vlerësuar lartë nga përfaqësues institucional dhe të biznesit në hapjen e seminarit dyditor mbi standardin e importit në SHBA dhe sistemin e përgjithshëm të preferencave.

Ministri i Bujqësisë Pylltarisë dhe Zhvillimit Rural (MBPZHR), Blerand Stavileci, me rastin e fillimit të kësaj punëtorie tha se Kosova ka burime të shumta natyrore derisa bujqësia ka rolin jetik në ekonomi për shkak të kushteve të mira për zhvillimin e këtij sektori.

Ai ka vlerësuar ndihmën e SHBA-ve, e cila sipas tij ka ndihmuar shumë edhe pse importi dhe eksporti i Kosovës me Amerikë është 15 milion dollarë me 1 milion në të mirë të importit.

“Si pjesë e mbështetjes së qeverisë së SHBA-ve në Kosovë edhe si UNDP në kontinuitet ka siguruar asistencë për të rritur dhe diversifikuar eksportet e Kosovës duke zhvilluar kapacitetet e prodhuesve kosovarë për të përfituar nga programet preferenciale amerikane të tregtisë përmes prezantimit të standardeve amerikane dhe të rregullativave të importit”, ka thënë Stavileci.

Në këtë drejtim ai ka theksuar se Kosova për këtë vit prioritet ka përkrahjen për frutat malore dhe bimët mjekuese për shkak të kërkesës për lëndë të parë në këtë fushë.

Ndërsa, Andrea Tomaxewicz, këshilltare e lartë ekonomike në Ambasadën e SHBA-ve në Kosovë theksoi se prioritet i qeverisë amerikanë është përkrahja e sektorit privat.

“Një nga qëllimet e qeverisë së Shteteve të Bashkuara të Amerikës është që ta ndihmoj sektorin privat dhe mendojmë se sektori privat do të jetë ai që do ta shpiej zhvillimin ekonomik të Kosovës përpara”, ka pohuar Tomaxewicz.

Për bilanc negativ tregtar të Kosovës është pajtuar edhe drejtori i Doganave të Kosovës Naim Huruglica, i cili ka thënë se po punohet në zvogëlimin e procedurave të eksportit. Ai theksoi se nga tetë dokumente që është dashur të plotësohen më parë tani nevojiten vetëm dy për të eksportuar mallra.

“Akoma vazhdojmë të jemi një vend i cili vazhdon të qesë para të gatshme jashtë shtetit në pamundësi të prodhimit gjegjësisht zëvendësimit sa më të lehtë dhe të shpejtë të importit me produkte vendore”, ka thënë Huruglica.

Ky seminar është organizuar Departamenti për Zhvillimin e Ligjit Tregtar në SHBA dhe Agjencia për Promovimin e Investimeve në Kosovë.

Rreth 50 palë interesi në Kosovë kanë rastin të mësojnë më shumë rreth politikave të standardit të importit në Amerikë në kuadër të projektit Commercial Law Development Program dhe Investment Promotion Agency of Kosovo.

Ndryshe, ministri Stavileci, sot gjatë ditës ka marrë pjesë edhe në hapjen e Panairit Regjional të Ndërmarrësisë, të organizuar nga Agjencioni për Zhvillim Ekonomik Rajonal në Lindje dhe projekti i SPARK-ut “Ngritja e potencialit ekonomik të Novobërdës, Kllokotit, Ranillugut dhe Shtërpcës”. Në këtë panair, i cili po mbahet në palestrën e sporteve “Bashkim Selishta” në Gjilan, po marrin pjesë rreth 100 agrobiznese të këtij regjioni. /Kosovapress/

 
 
 
 
comments powered by Disqus
 
 
 
 
 

Ju rekomandojmë