• Lajmi
  • KosovaPress, 05 Prill 2012 19:47

Promovohet monografia kushtuar Feriz Aliukajt

prev next
 
Të ngjajshëm

Në Prishtinë sot u promovua libri monografik kushtuar Feriz Aliukajt (1937-1999), i historianit Fehmi Pushkolli. Libri i është kushtuar atdhetarit dhe luftëtarit të lirisë Feriz Aliukaj, pjesëtar i familjes së njohur Aliukaj të Polacit të Skenderajt, i një trungu të përbashkët familjar me patriotin e shquar Hasan Prishtina.

Recensenti Haki Kosumi, i cili paraqiti një pjesë të vështrimit për këtë libër, librin e quan si një dhuratë e çmuar që i dhurohet opinionit publik dhe se me këtë libër po rrënohet embargoja e historisë së Drenicës.

“Gjatë 87 viteve të robërisë serbo-jugosllave, trajtimi i mirëfilltë i historisë së popullit shqiptar, në trevën e Drenicës ka qenë nën embargo, përkatësisht e ndaluar. Gati të gjitha trajtimet që janë bërë gjatë kësaj periudhe, kanë qenë joobjektive të njëanshme dhe tendencioze. Këso lloj qasjesh ndaj të kaluarës shqiptare në përgjithësi dhe ndaj Drenicës në veçanti, kishte dhe vazhdon të ketë historiografia serbe dhe të tjerë të ndikuar nga propaganda antishqiptare. Në vitet e fundit, gjithnjë e më tepër, po rrënohet një tendencë e tillë negative edhe e paqëndrueshme ndaj një treve dhe popullate e cila gjithherë ishte njëra ndër të parat që i kundërvihej në mënyrë të armatosur të gjithë pushtuesve të vendit tonë”, tha ai.

Ndërsa autori i librit Fehmi Pushkolli, falënderoi recensentët për vlerësimin e këtij libri. Ai tha se është detyrë e tij si historian të ndriçoj historinë e përgjithshme përmes një shembulli të veçantë. Ai tha se të dhënat e fshehura të së kaluarës sonë duhet të hapen dhe të dalë në sheh e vërteta për historinë.

“Dua të shpalos sallën e historisë për dituritë e fshehta të paraardhësve tanë, dituritë për paraardhësit tonë, janë të vendosura në sallën e historisë. Ato dituri ishin të njohura prej atyre që krijuan historinë nëpër epoka. Por, sa më shumë që kalonte koha, ato u fshehën në sallën e historisë. Sa më shumë që zhvillohej mendja e njeriu, filloi interesimi për procesin e formimit të njeriut dhe historisë së tij. Për të zbuluar të vërteten duhej filluar me kërkime shkencore të vlerave që kishin krijuar paraardhësit dhe ishin si mbetje mbi tokë. Por, kjo ishte dëshmuar si e pamjaftueshme për të mësuar dhe shpjeguar rrugën prej nga vjen, sepse ajo hap orientimin se ku duhet shkuar. Kjo i detyroi të kërkoj ndihmë edhe nga nëntoka, e cila i ruajti fshehtësitë si për popujt e tjerë, ashtu edhe për paraardhësit tonë”, tha ai.

Ndërsa Mehmet Feriz Prishtina, i biri i atdhetarit Feriz Aliukaj, tha se studimi monografik, është dëshmi për të vërteten historike dhe luftën e bërë, e cila ishte e pathënë derë më tani.

“Kjo është vazhdimësi e luftës së popullit të këtij fshati të Drenicës. Lufta e popullit të Drenicës është hyjnore, luftë për atdhe çlirim kombëtar kundër të gjithë armiqve që pushtuan trojet shqiptare edhe të kësaj ane. Tradita e luftës është virtyt i kultivuar me shekuj dhe është forcuar gjatë shekullit XX kundër Serbisë, ashtu si ishte nisma e Hasan Prishtinës dhe aspiratave të tij për çlirimin dhe bashkimin kombëtar”, tha ai.

Ndryshe libri Feriz Aliuka (1937-1999) i dedikohet të gjithë luftëtarëve të kombit shqiptar, të cilët krijuan traditën e artit ushtarak dhe u pajisën me virtyte morale të dinjitetshme për njeriun, ata janë e vërteta e procesit historik të kombit shqiptar./S.ZOGAJ