Prishtina kujton “ditët e krenarisë”

prev next
 
Prishtinë E mërkurë, 18 Prill 2012 18:39

Komuna e Prishtinës me një sërë aktivitetesh e ka përfunduar aktivitetin “Ditët e Krenarisë dhe Ditën e Dëshmorëve të UÇK-së” në këtë komunë. Përmbyllja e këtij aktiviteti u bë me një akademi përkujtimore për dëshmorët ku u tha se kjo është një ditë e njerëzve të mëdhenj dhe e familjeve që në gjirin e tyre rritën dhe edukuan martirët e lirisë.

Me këtë rast, u kërkua që për veriun të ballafaqohemi me një përkushtim të fort dhe serioz njerëzor, sepse siç u tha, ua kemi borxh të parëve dhe gjithë atyre që u flijuan për Kosovë.

Kryetari i Komunës së Prishtinës, Isa Mustafa, deklaroi se dëshmorët sakrifikuan për lirinë dhe pavarësinë e këtij vendi, prandaj Prishtina do t’i përkulet me respektin më të madh të gjithë atyre që derdhën gjakun për lirinë e vendit tonë, por, po ashtu do të jenë përjetësisht mirënjohës vendeve që ndihmuan në shtegtimin drejt lirisë.

“Sot është ditë e veprave të mëdha, e njerëzve të mëdhenj, ditë e familjeve që në gjirin e tyre rritën dhe edukuan martirët e lirisë, ditë kur Kosova dhe Prishtina do të mburrën me bijtë e saj, vepra e të cilëve shtohet çdo ditë ashtu siç rritet edhe shtohet kombi i ynë”, ka thënë Mustafa.

Ai shtoi se është dëshmuar se liria e ka kuptimin e vërtet vetëm atëherë kur njerëzve u shtohen shpresat për të pasur dhe për të gëzuar jetë më të mirë dhe më normale në një shtet i cili punon për interesat e qytetarëve të saj.

Sipas tij, është pritur që do të bëhet më shumë në këto vitet e pas çlirimit, se do të ndërtohet një shtet në të cilin do të funksionojë ligji, dhe në të cilin gjithë qytetarët do të trajtohen të barabartë, pavarësisht se kush e fiton pushtetin.

“Edhe pas këtyre viteve të çlirimit, të administrimit ndërkombëtar nga UNMIK-u, të marrjes së përgjegjësive nga qeveria e Kosovës, pas shpalljes së pavarësisë, një pjesë e territorit të vendit tonë në veri akoma mbetet jashtë sovranitetit ku veprojnë grupe kriminale të organizuara nga Beogradi, prandaj janë disa nga sfidat me të cilat duhet të ballafaqohemi me një përkushtim të fort dhe serioz njerëzor, sepse ua kemi borxh të parëve por ua kemi borxh gjithë atyre që u flijuan për Kosovë”, ka thënë ai.

Kurse, në emër të kategorive të dala nga lufta, të pranishmëve iu drejtua Qendron Kastrati, i cili tha se në asnjë çast nuk guxohet të harrohet betimi i ushtarëve të UÇK-së dhe ideali për të cilin u flijuan dhe të cilin duhet vazhduar për gjeneratat që vijnë.

“Edhe 13 vite pas përfundimit të luftës çlirimtare, familjet e dëshmorëve, luftëtarët e lirisë ndihen të nënçmuar dhe mjerisht shpesh të përbuzur nga institucionet tona, andaj shfrytëzojë nga rasti që të bëjë thirrje te të gjithë për një seriozitet dhe përkushtim më të madh në zgjedhjen e shumë çështjeve me rëndësi. Familjarët e dëshmorëve, invalidët e luftës dhe veteranët e Ushtrisë Çlirimtare janë një dhe do të reagojnë me një zë sa herë ta kërkojë nevoja”, ka thënë ai.

Ndryshe, gjatë ditës, drejtues të Komunës së Prishtinës kanë bërë homazhe në Varrezat e Dëshmorëve, nderime te shtatorja e Zahir Pajazitit, homazhe te varrezat e Dëshmorëve dhe Martirëve në fshatin Makoc, në fshatin Mramor, në fshatin Marec dhe në fshatin Sharban. /Kosovapress/

 
 
 
comments powered by Disqus
 
 
 
 
 

Ju rekomandojmë