Suspendohet polici, vodhi në hipermarket

prev next
 
Mitrovicë E premte, 20 Prill 2012 14:50

Një polic është suspenduar nga puna, pasi kishte vjedhur ditë më parë gjësende të ‘teknologjisë së imtë’ në kompaninë ETC në Mitrovicë, bëjnë të ditur burime të Kosovapress-it brenda kësaj kompanie.

Suspendimin dhe hapjen e procedurës hetimore ndaj policit e ka konfirmuar për Kosovapress edhe zëdhënësi i policisë në Mitrovicë, Besim Hoti.

“Polici ishte në rroba civile dhe shikonte nëpër rafte gjëra të ndryshme. Ai hapte kapakët e eurokremit 2 kg, dhe pasi hante një sasi të kremit, në të vendoste mallra që vidhte. Kryesisht kishte vjedhur ‘haj-teh’ teknologji të cilat i vendoste në një qese plasmasi speciale, e pastaj i fuste në kutinë e kremit. Ai ka marrë edhe një kuti me ngjyrë dhe vepronte njëjtë duke futur gjësende në të”, kanë thënë burimet, duke shtuar se e tërë ngjarja është incizuar me kamera të sigurisë.

Sipas burimeve, në shumë vende në hapësirat e hipermarketit janë mbishkrimet “kujdes jeni nën vëzhgimin e kamerave”, por si duket kjo nuk ka zgjuar vëmendjen e policit.

Burimet më tej shtojnë se pas gjithë kësaj ngjarje që ka zgjatur rreth 10 minuta, sigurimi ka njoftuar Policinë e Kosovës, e cila menjëherë ka dalë në vendin e ngjarjes.

“Kur polici që ishte shërbyer në ETC ka arritur tek arka dhe ka paguar eurokremin dhe ngjyrën, në atë moment kanë reaguar pjesëtarë të Policisë së Kosovës, duke e urdhëruar kolegun e tyre të hapë kutitë për të parë se çka ka futur në to”, bëjnë të ditur burimet.

Sipas burimeve, polici është arrestuar, ndërsa edhe një kopje e xhirimit tani është marrë nga policia.

Në anën tjetër, zëdhënësi Hoti ka thënë se një pjesëtar i Policisë së Kosovës është suspenduar nga puna pasi që dyshohet të ketë qenë i implikuar në një vjedhje në hipermarketin e ETC-së. Sipas tij, polici është arrestuar në vendin e ngjarjes dhe është sjellë në stacionin e policisë ku është intervistuar, ndërsa më pas ai është liruar.

“Ndaj policit menjëherë është hapur edhe procedura tjetër në inspektoratin e policisë” ka thënë Hoti. /Kosovapress

 
 
 
 
comments powered by Disqus
 
 
 
 
 

Ju rekomandojmë