Përurohet objekti i ri i shkollës “Hoxhë Kadri Prishtina”

prev next
 
Prishtinë E martë, 20 Nentor 2012 15:31

Shkolla e mesme ekonomiko-juridike “Hoxhë Kadri Prishtina” në Prishtinë u bë me objekt të ri. Përurimin e këtij objekti e bënë Ministri i Arsimit, Shkencës dhe Teknologjisë Ramë Buja dhe kryetari i Komunës së Prishtinës Isa Mustafa.

Me këtë rast, Ministri i Arsimit Ramë Buja tha se kjo shkollë do të realizojë synimin e përbashkët të të gjithëve, rritjen e cilësisë në arsim.

“Ne na gëzon çdo hap që bëjmë në drejtim të arsimit, çdo ndërtesë shkollore që bëjmë për të ecur përpara, sepse nuk ka njeri esëll, me mendje të shëndoshë, i çfarëdo grupacioni, qoftë politik a shoqëror, që nuk e dëshiron ecjen në arsim. Andaj, ne po bëjmë hapa seriozë. Këtë shkollë e ka ndërtuar Komuna e Prishtinës të cilën e urojmë dhe përgëzojmë”, ka thënë Buja.

Ai tha se ambienti i mirë ndikon në deponimin e mirë të arsimtarëve dhe nxënësve. Ndërsa kryetari i Komunës së Prishtinës, Isa Mustafa tha se kjo shkollë u ndërtua për arsye se është konsideruar të krijohen kushte më të mira për nxënësit.

“Konsideruam se duhet të krijojmë kushte shumë të mira për ju; një financim prej 1 milion e 399 mijë euro, afërisht afër 1 milion e 400 mijë euro, por paratë janë shumë më pak në krahasim me vlerat që do t’i kemi të përbashkëta, në krahasim me suksesin që do të arrini ju së bashku me ne”, ka thënë Mustafa.

Ndërkaq, drejtori i shkollës, Jahë Sahitaj tha se e veçanta e kësaj shkolle është se këtu mësojnë edhe nxënës të etnitetit ashkali, por edhe nxënës me aftësi të kufizuara, të cilëve u është dhënë shansi të jenë të barabartë me nxënësit e tjerë.

Financimin e kësaj shkolle e ka bërë Komuna e Prishtinës.

 
 
 
 
comments powered by Disqus
 
 
 
 
 

Ju rekomandojmë