As pas 13 vjetësh, asnjë gjurmë për 1781 të pagjetur (me video)

prev next
 
Prishtinë E premte, 27 Prill 2012 12:50

“Nisma e të Rinjve për të Drejtat e Njeriut në Kosovë” dhe aktivistët “Nisma Ime”, në Ditën kombëtare të personave të pagjetur, kanë vendosur 1781 pikëpyetje në sheshin “Nëna Terezë” në Prishtinë, duke reaguar kështu ndaj mos zbardhjes së fatit të aq personave që ende figurojnë si të pagjetu që nga përfundimi i luftës së fundit në Kosovë.

Liridon Zeka, aktivist i organizatës “Nisma e të Rinjve për të Drejtat e Njeriut”, ka thënë se qëllimi i këtij aktiviteti është që të shtojnë presionin tek institucionet përkatëse që të zbardhin fatin e të gjithë personave të zhdukur gjatë luftës së fundit në Kosovë.

“Është viti i pestë me radhë që ‘Nisma e të Rinjve për të Drejtat e Njeriut’, në bashkëpunim me rrjetin e aktivistëve ‘Nisma Ime’, organizon aktivitetin për të shënuar ditët e caktuara për personat e pagjetur. Duke parë mungesën e angazhimit të institucioneve përkatëse për zbardhjen e fatit të personave të pagjetur ne si organizatë për të drejtat e njeriut dhe si aktivistë e kemi parë të arsyeshme që të organizojmë aktivitete për të bërë presion tek institucionet në mënyrë që të jenë sa më efikase në punët e tyre”, ka thënë ai.

“Nisma e të Rinjve për të Drejtat e Njeriut në Kosovë”, respektivisht, aktivistë të saj, kanë bërë të ditur se aktivitete të tilla simbolike kanë zhvilluar edhe në të kaluarën, por si duket institucioneve gjegjëse nuk u kanë lënë shumë përshtypje, porse tregon se megjithatë tek popullata është rritur vetëdijesimi dhe interesimi për të mësuar për fatin e të zhdukurve. Sipas tyre, numri i personave të pagjetur vazhdon të mbetët ende i madh.

“Aktiviteti i sotëm është njëri prej aktiviteteve që është zhvilluar në të kaluarën. Kjo ka për qëllim që të tregojë se numri i personave të pagjetur vazhdon të jetë ende i madh që është 1781, ndërsa ne në vazhdimësi kemi dashur ta theksojmë se ky numër paraqet individ, e jo vetëm një numër. Kështu që të specifikohet secili si individ në veti”, ka thënë ai.

Ndryshe, që nga përfundimi i luftës në Kosovë në vitin 1999, fati i 1781 njerëzve të zhdukur gjatë luftës ende nuk dihet, edhe pse nga organizata të ndryshme vendore dhe ndërkombëtare është ushtruar presion tek institucionet relevante të Beogradit, por rezultatet deri tash kanë qenë të pakta.

Sidoqoftë, shënimi i kësaj dite bëhet për faktin se në këtë datë, më 27 prill të vitit 1999, në fshatin Mejë të komunës së Gjakovës, forcat ushtarake dhe policore serbe patën vrarë dhe zhdukur 377 civilë shqiptarë të moshës nga 15 deri në 75 vjeç. /Kosovapress/

 
 
 
comments powered by Disqus
 
 
 
 
 

Ju rekomandojmë