• Lajmi
  • KosovaPress, 08 Mars 2013 12:59

Kuçi premton kompensim për femrat e dhunuara gjatë luftës

prev next
 
Të ngjajshëm

Femrat e dhunuara gjatë luftës do të kompensohen përafërsisht sikur familjarët e të pagjeturve. Kështu është shprehur ministri i Drejtësisë, Hajredin Kuçi duke thënë se qoftë me ligj të veçantë, qoftë në kuadër të ndonjë ligji tjetër, ato do të kenë përkrahjen e shtetit.

Këto deklarata ai i ka bërë në tryezën me temë “Qasja në drejtësi për gratë dhe vajzat, viktima të dhunës seksuale gjatë luftës në Kosovë” të organizuar nga Agjencia për Barazi Gjinore.

Në këtë tryezë u tha se përveç krejt tjerash ato më shumti vuajnë nga paragjykimet që u bëhen nga shoqëria.

Derisa u tha se ministria e Punës nuk ka të dhëna zyrtare se sa femra janë dhunuar apo malltretuar gjatë luftës në Kosovë, ministrja e Integrimeve, Vlora Çitaku tha se për 20 mijë gra dhe familjet e tyre lufta ende nuk ka përfunduar.

Ministri Kuçi është shprehur se si baba i tri vajzave, djali i një nënë që e do fort dhe burri i një gruaje që i ka ofruar rehati, pranon se barazia gjinore ka shumë rëndësi në jetë por edhe për vendin.

Ku ka folur për mbrojtjen ligjore të këtyre grave tha se janë dy ide: të jetë ligj i veçantë për këto gra edhe pse ato nuk duan të ketë ligj të veçantë për to, dhe e dyta që në ligjin për veteranët, familjet e dëshmorëve dhe viktimat civile të amandamentohet ky ligj.

Sipas tij, cilindo variant që vjen në konsideratë, janë të gatshëm ta implementojnë.

“Mënyra si do të kenë qasje në drejtësi femrat e dhunuara gjatë luftës, dhe e dyta në mënyrën si trajtohen ato nga familja, nga vendpunimi dhe shoqëria. Nëse nuk i arrijmë këto dyja di duhet nuk guxojmë ta lëndojmë jetën e asnjë gruaja, vajze apo motre në këtë vend. Këtu shoqëria civile mund të luaj rolin më të madh. Dhe kur u përmend mbrojtja ligjore, Qeveria është gatshme të sigurojë mbrojte ligjore sa i përket kompensimit në kuptimin e asaj, se nuk është kompensim asnjëherë ajo që ka ndodhur gjatë luftës, por të kompensimit përafërsisht me të familjeve të të pagjeturve apo në raste të caktuara edhe me viktimat e tjera civile”, ka thënë ai.

Ndërsa ministrja e Integrimeve, Vlora Çitaku ka thënë se femrave në Kosovë i duhet ende të luftojnë dhunën në familje, të luftojnë për barazi të shkollimit të tyre, për të drejtën në pronë, për emancipimin në vend por edhe për paragjykimet që i bëhen në Kosovë.

Çitaku ka thënë se gjendja e tyre nuk përmirësohet vetëm me ndihna por me projekte dhe ligji që do u mundësoheshin të gjitha në jetë.

“Gratë dhe vajzat e dhunuara gjatë luftës në Kosovë, janë kategori që deri më tani ka qenë e harruar nga shoqëria, nga familja dhe nga institucionet. Që nga paslufta, gjendja e këtyre grave jo vetëm në aspektin materiale por edhe në atë social, shëndetësor e juridik, e mbi të gjitha në atë shpirtërore ka qenë e mjerueshme. Ne si institucione duhet të përballemi dhe ti japim zgjidhje këtij problemi. Lufta në Kosovë për shumë prej nesh ka përfunduar para 13 vitesh, për 20 mijë gra dhe familjet e tyre ko luftë vazhdon”, ka thënë ajo.

Në anën tjetër, zëvendësministri i Punës dhe Mirëqenies Sociale, Berat Luzha ka thënë se nuk ka evidencë për gratë viktima të përdhunimeve gjatë luftës në Kosovë.

“Ministria e punës nuk ka evidencë për gratë dhe vajzat viktima të përdhunimeve gjatë luftës në Kosovë, deri tash asnjë viktimë e dhunës e kësaj kategorie nuk është paraqitur në qendrat për shërbime komunale për punë sociale, apo në ndonjërën organizata joqeveritare me të cilat ministria ka kontrata apo marrëveshje bashkëpunimi”, ka thënë ai.

E kryeshefja ekzekutive e Agjencisë për Barazi Gjinore, Edona Hajrullahu ka thënë se krahas punës për të siguruar infrastrukturë ligjore dhe institucionale që siguron mbrojtje, fokus të veçantë në heqjen e paragjykimeve dhe krijimin e një ambienti të barabartë./Kosovapress/