Kosova do të bëhet me Ent të Punësimit

prev next
 
Prishtinë E shtune, 07 Korrik 2012 21:13

Gjatë vitit të ardhshëm pritet të themelohet Enti i Punësimit në Kosovë. Ministri i Punës dhe Mirëqenies Sociale, Nenad Rashiq, tha se janë në fazën e përgatitjes së dokumentit përkatës. Përmes këtij enti do të krijohen politika më të qarta të punësimit, e njëkohësisht do të bëhet evidencimi i saktë i të papunëve në Kosovë.

Ndonëse papunësia vazhdon të jetë ndër problemet kryesore në Kosovë, ende nuk ka politika të qarta për zvogëlimin e saj. Njëkohësisht nuk ka as statistika të sakta të të papunëve dhe operohet me vlerësime.

Por këto probleme duket se do të zgjidhen. Ministri i Punës dhe Mirëqenies Sociale, Nenad Rashiq, paralajmëron themelimin e një enti të punësimit, që do të jetë shumë i rëndësishëm për vendin.

“Në jemi duke përgatitur një koncept-dokument, një ligj i cili ka qëllim themelimin e Entit për Punësim. Ne duam ta legalizojmë këtë zyrë në nivel të lartë, në nivel profesional, në mënyrë që ky ent më pas të arrijë të tërheqë fonde dhe do të ketë një politikë më të saktë dhe më të qartë të punësimit”, thkesoi ai.

Njohësit e çështjeve ekonomike e vlerësojnë të dobishëm themelimin e Entit të Punësimit. Kryetari i Odës Ekonomike Amerikane, Arian Zeka, thotë se rëndësia e tij parësore do të jetë në mbajtjen e të dhënave më të sakta rreth punëkërkuesve që regjistrohen në këtë ent.

“Rëndësia tjetër e themelimit të një enti të tillë është që t’iu mundësojë këtyre njerëzve të papunë, të gjejnë vende të punës, duke u regjistruar aty, duke pasur një pasqyrë të qartë të shkathtësive që ata të papunë i kanë, dhe në këtë mënyrë mund të krijonim pasqyra më të qarta se çfarë mund të gjejnë kompanitë në tregun e punës”, tha Zeka për Radio Kosovën.

Prej 2002 deri në 2005 ka funksionuar një zyrë punësimi, por jo në formën që parashihet të krijohet tani. Ministri Rashiq thotë se projektligji do të jetë pjesë e legjislacionit për vitin 2013.

 
 
 
comments powered by Disqus
 
 
 
 
 

Ju rekomandojmë