• Lajmi
  • KosovaPress, 19 Prill 2012 12:45

Prerja ilegale e pyjeve mbetet shqetësim (me video)

prev next
 
Të ngjajshëm

Edhe përkundër punës që është bërë, prerja ilegale e pyjeve në Kosovë, vazhdon të jetë në përmasa shqetësuese. Kështu ka pohuar ministri i Bujqësisë, Pylltarisë dhe Zhvillimit Rural, Blerand Stavileci në takimin për Rishikimin e Përbashkët Vjetor për Sektorin e Pylltarisë, ku u diskutuan prioritetet në sektorin e pylltarisë 2012-2014, Ligji i ri për Pyjet, modeli i ri institucional për Bordin për Menaxhimin e Pyjeve si dhe për procesin e decentralizimit në pylltari.

Sipas Stavilecit rishikimi i përbashkët vjetor, është edhe një hap i rëndësishëm në drejtim të planifikimit më të mirë të veprimeve për këtë sektor. Ai ka thënë se qëllimi i këtij takimi, i cili, tani e pas, do të jetë i përvitshëm, është që të gjitha palët të takohen me njëra-tjetrën, të diskutojnë, të përpiqen ta intensifikojnë bashkëpunimin dhe të arrijmë t’i bashkërendojmë veprimet për zhvillimin e sektorit të pylltarisë.

Në bazë të Strategjisë së Pylltarisë 2010-2020, ai ka thënë se kanë filluar një proces të planifikimit të integruar dhe së bashku me donatorët, nëpërmjet një qasjeje shumëdimensionale, si në veprime, ashtu edhe në financime të projekteve të ndryshme, po bëhet përpjekje e vazhdueshme, që të krijohet një sistem më i mirë për planifikimin afatmesëm dhe sa më efikas, i cili do të shoqërohet edhe me ndërtimin e një sistemi për monitorimin dhe vlerësimin e zbatimit të planeve.

“Viteve të kaluara ne e kemi filluar delegimin e disa prej kompetencave nga niveli qendror, në nivelin lokal për menaxhimin e pyjeve dhe pas kësaj periudhe kohore, përkundër punës që është bërë, fenomenet negative si; prerja ilegale e drunjve mbesin ende në përmasa shqetësuese për ne. Nuk mund të thuhet që nuk kemi lëvizje pozitive, sepse indikator i matshëm i lëvizjeve pozitive është edhe trefishimi i të hyrave nga shitja legale e masës drusore në vitin e kaluar. Por duhet rritur efikasitetin e mekanizmave implementues dhe monitorues për të arritur deri tek menaxhimi i qëndrueshëm i resurseve tona pyjore. Dhe duhet rritur edhe më shumë bashkëpunimin mes dy niveleve dhe t’i harmonizojmë më shumë veprimet tona, sepse vetëm në këtë mënyrë mund të prodhojmë rezultate edhe më të mëdha”, ka pohuar Stavileci.

Ai po ashtu ka thënë se duhet rritur koordinimin, veçanërisht për sa i përket financimit të projekteve të ndryshme, që këto t’i kanalizojnë në projektet që janë më prioritare. Po ashtu, duhet të shikohet se sa mund ta financojnë nga buxheti i tyre tre-vjeçar, në bazë të Kornizës Afatmesme të Shpenzimeve dhe çfarë mund të plotësohet nga financimi i donatorëve.

Ndërsa Kushtrim Cukaj, kryesues i Bordit për menaxhimin e Pyjeve ka thënë se sektori i pylltarisë, ka pasur probleme në të kaluarën dhe se për ta ndryshuar këtë dhe për të ecur përpara, nevojitet një angazhim dhe koordinim edhe më i madh. Në këtë drejtim edhe themelimi i Bordit për menaxhimin e pyjeve, që është bërë nga Qeveria e Kosovës, sipas tij, do të ndihmojë që koordinimi të jetë më nivel dhe të gjendet një gjuhë e përbashkët, midis akterëve kryesor në pylltari, që të arrihen ato rezultate që i presin qytetarët edhe Qeveria e vendit. Megjithatë, sipas tij, gjykatat nuk po kryejnë punën si duhet sa i përket ndëshkimit të personave që bëjnë shkelje të tilla.

“Edhe pse rangimi i strukturave, që kanë të bëjnë me parandalimin e prerjeve ilegale, në pyjet e Kosovës ka pasur veprimtari dhe reagim më intenziv, ne vërejmë edhe nga prezantimet më herët se marrja e vendimeve nga ana e gjykatave për personat që i bëjnë këto shkelje, ka qenë jo në nivelin e kënaqshëm. Ne kërkojmë që kjo situatë të ndryshojë, bashkërisht edhe me ministrinë tonë dhe atë të Drejtësisë dhe Këshillin Gjyqësor, ne shpresojmë se do të ndikojmë pozitivisht, që këto lëndë të përshpejtohen”, ka thënë ai.

Edhe Maria Nelbing, përfaqësuese e ambasadës suedeze në Prishtinë ka thënë se gjendja aktuale në sektorin pyjor mbetet shqetësuese. Sipas saj, me qëllim që të fuqizojnë edhe më shumë perspektiven e sektorit të pylltarisë, duhet të përmirësohet bashkëpunimin në mes të donatorëve dhe Qeverisë, përmes mekanizmave të rishikimit vjetor dhe themelimit të një fondi të përbashkët.

“Duhet të jemi të brengosur jo vetëm për situatën aktuale në sektorit pyjor në Kosovë por edhe për gjendjen në sektorë të tjerë. Disa donatorë kanë përkrahur dhe projektet janë duke adresuar në fusha të rëndësishme në sektorin e pylltarisë dhe çdo projekt është relevant. Ambiciet tona, janë që të kemi një perspektivë gjithë përfshirëse. Dokumenti politik dhe strategjik për zhvillimin e sektorit të pylltarisë 2010-2020 është dokumenti kryesor, drejtues, të cilin ne do ta përcjellim dhe do t’i bëjmë rekomandimet tona në të ardhmen, me qëllim që ta fuqizojmë sektorin e pylltarisë në vijë me këtë strategji”, ka thënë Maria Nelbing, përfaqësuese e ambasadës suedeze në Prishtinë. /Kosovapress/