Gjykata e Qarkut në Pejë po tregohet efikase

prev next
 
Pejë E shtune, 21 Prill 2012 17:13

Sipas udhëheqësve të Gjykatës së Qarkut në Pejë janë bërë punë të mira në këtë gjykatë dhe shumica e lëndëve të mbledhura nga vitet e kaluara janë zgjidhur, ndërsa gjyqtarët tani janë duke u përgatitur për zgjidhjen e lëndëve të reja.

Sali Mekaj, kryetar i Gjykatës së Qarkut në Pejë ka thënë se, gjatë këtij viti, për dallim nga vitet e mëparshme, janë pranuar më shumë lëndë të reja dhe po ashtu janë zgjidhur më tepër lëndë të vjetra të cilat qëndronin në sirtarët e kësaj gjykate. “Për tre muaj të këtij viti i kemi pranuar 1034 lëndë, ndërsa gjatë kësaj periudhe janë zgjidhur 1115 lëndë në përgjithësi , pra kemi një efikasitet të lartë të gjyqtarëve”, pohoi Mekaj.

Sipas të parit të kësaj gjykate, Gjykata e Qarkut në Pejë në krahasim me gjykatat tjera të Kosovës qëndron më së miri me numrin e lëndëve të zgjidhura, për të cilën gjë shprehet i kënaqur kryetari Mekaj. “Unë e kam një raport vjetor të cilin e publikon këshilli gjyqësor i Kosovës dhe në krahasim me gjykatat e tjera në nivel vendi e kemi numrin më të madh të lëndëve të zgjidhura si për kokë gjyqtari, ashtu edhe si gjykatë në përgjithësi”, ka thënë ai.

Mekaj, po ashtu ka thënë se Gjykata Komunale e Klinës, krahasuar me gjykatat e tjera komunale të qarkut të Pejës, e ka gjendjen pak më të vështirë dhe përballet me numër të vogël të gjyqtarëve. “Gjendja në gjykatat komunale Pejë, Junik dhe Gjakovë është e kënaqshme dhe kemi numër të mjaftueshëm gjyqtarësh, kurse Gjykata Komunale e Klinës po has disa vështirësi në zgjidhjen e lëndëve pasi që në këtë gjykatë është vetëm një gjykatës i lëndës, andaj këtu paraqitet mungesa e efikasitetit”, ka pohuar Mekaj. /Kosovapress/

 
 
 
 
comments powered by Disqus
 
 
 
 
 

Ju rekomandojmë