• Lajmi
  • KosovaPress, 07 Maj 2012 12:40

Për tre muaj, KEK-u bënë shkelje në tre tenderë (me video)

prev next
 
Të ngjajshëm

Shkelje ligjore në 11 tender të ndryshëm kanë bërë ministritë, ndërmarrjet publike KEK dhe PTK si dhe komunat, për vetëm tre muajt e parë të këtij viti. Sipas raportit të Lëvizjes FOL, për monitorimin e prokurimit, të gjeturat e raportit tregojnë, se në shkeljet ligjore në gjithsej 11 tender të ndryshëm, prej tyre 8 janë kthyer në rivlerësim nga ana e organit shqyrtues të prokurimit publik, dy janë kthyer në ritenderim dhe vetëm një aktivitet prokurimi është marrë vendimi, për vazhdim të aktivitetit të prokurimit.

Koordinatori i projektit, Armend Pjaziti ka thënë tw hwnwn se ministritë kanë shkelur dispozitat ligjore në 4 tenderë, ndërmarrjet publike, KEK dhe PTK, 4 tenderë si dhe komunat 3 tenderë.

Pajaziti ka treguar edhe tenderët në të cilët është bërë shkelje nga ministritë. Sipas tij, ministria e Punëve të Brendshme me rastin e tenderit “Furnizimi me karburante”, ministria e Kulturës në aktivitetin e prokurimit “Ndërtimi i Palestrës Sportive në Komunën e Klinës – faza e II-të”, ministria për Komunitete dhe Kthim në tenderin “Shërbime hoteliere në ndërtesën e MKK-së” dhe ministria e Infrastrukturës me rastin e vlerësimit të tenderit “Shërbimet e mirëmbajtjes së seksionit 1 deri në 5 të rrugës nr.7: autostrada Morinë-Merdare”.

Pajaziti gjithashtu ka thënë se Organi Shqyrtues i prokurimit Publik ka shqiptuar edhe një gjobë ndaj Ministrisë së Infrastrukturës në vlerë prej 10 mijë eurove, si dhe ka revokuar licencën e ushtruesit të drejtorit të kësaj ministrie për ushtrimin e veprimtarisë në fushën e prokurimit publik.

Kur jemi te ndërmarrjet publike, ai ka thënë se KEK-u ka bërë tre shkelje, ndërsa PTK vetëm një shkelje.

“Ndërmarrjet publike, KEK dhe PTK, kanë bërë shkelje në katër tenderë të ndryshëm. KEK ka bërë shkelje në tre tenderë, atë për ‘shërbime ndihmëse në largimin e djerrinës’, në ‘furnizim me kemikale’ dhe në ‘furnizim me shirit gome’. Ndërkaq PTK-ja në vetëm një tender ‘benefite për sigurimin shëndetësor’. Të katër tenderët e këtyre ndërmarrjeve janë kthyer në ri-vlerësim”, ka thënë ai.

Komunat kanë bërë shkelje ligjore në gjithsej tre tenderë, ajo e Prizrenit ka bërë një shkelje, komuna e Gjilanit një dhe një tjetër komuna e Pejës.

Sa i përket gjobave, FOL rekomandon që ato të jenë shumë më të larta, si dhe të gjobiten edhe vet zyrtarët e prokurimit, jo vetëm institucioni.

“Lëvizja FOL ka kërkuar vazhdimisht që të fillohet të gjobiten edhe zyrtarët e prokurimit, pra ata që bëjnë shkeljet, madje në disa raste kemi kërkuar që gjobat të rriten sepse ka pasur gjoba të ulëta për zyrtarët e prokurimit, që ka qenë vlera minimale 1 mijë euro ose 1 mijë e 500 euro, ne kemi kërkuar që gjobat të jenë më të mëdha për zyrtarët e prokurimit që shkelin ligjin, dhe të merren edhe masa të tjera komfor ligjeve ekzistuese”, tha ai.

Lëvizja FOL ka bërë të ditur se këto janë shkeljet e evidentuara, dhe nuk do të thotë që nuk ka pasur shkelje të tjera, si nga institucionet e njëjta, apo edhe nga institucionet e tjera.

Hulumtimi i Lëvizjes FOL janë përzgjedhur vetëm katër gazetat kryesore ditore në Kosovë, kjo sipas FOL-it, për shkak të lejueshmërisë së tyre dhe karakteri hulumtues i tyre./Kosovapress/