• Lajmi
  • KosovaPress, 05 Prill 2012 14:41

Fermerët bashkohen në union

prev next
 
Të ngjajshëm

Tash e tutje të gjithë fermerët e Kosovës do të mund të kenë një adresë të vetme për kërkesa, ankesa, njoftime dhe gjithçka tjetër, dhe jo vetëm për përfaqësim brenda vendit, por edhe në shtetet e BE-së.

Ministria e Bujqësisë dhe Iniciativa për Zhvillimin e Bujqësisë në Kosovës (IADK) kanë nënshkruar një memorandum bashkëpunimi, që IADK-së i njihet roli për lehtësimin e procesit të krijimit të unionit nacional të fermerëve në Kosovë.

Ndër të tjera, ky memorandum u mundëson fermerëve të jenë në mënyrë aktive të përfshirë në krijimin e politikave, në krijimin e legjislacionit dhe në zbatimin e tyre.

Ministri i Bujqësisë, Blerand Stavileci, ka pohuar se është më se e nevojshme të ketë një linjë të vetëm komunikimi dhe një organizim më të fuqishëm.

“Konsiderojmë se shoqatat e ndryshme, statusi juridik i të cilave janë si organizata qeveritare është e rëndësishme që të flasin me një zë të artikuluar dhe të arsyeshëm për t’i përfaqësuar kërkesat e tyre. Sot, ne si ministri jemi në shënjestër të kërkesave të shumta, qoftë ankesave dhe shqetësimeve të cilat na shprehen, edhe përkundër vullnetit tonë t’i zgjedhim ato në rrugën e duhur shpeshherë ndodh një kërkesë e caktuar që na vjen prej një shoqate pastaj interpretohet apo jepet ndryshe prej një përfaqësuesi në mënyrë individuale ose edhe kur dalim në terren përfaqësues të po asaj shoqate kanë edhe kërkesa të tjera. Prandaj, unë konsideroj se nëse të gjitha shoqatat që ekzistojnë, të prodhuesve, të përpunuesve të qumështit, të perimtarëve, të pemëtarëve , të vreshtarëve nëse gjejnë një formulë të mirë të organizimit, do të jenë rrjedhimisht edhe një organizatë më e fuqishme që mund t’i adresojë kërkesat e tyre”, ka thënë ai.

Ndërsa, drejtori ekzekutiv i IADK-së, Zenel Bunjaku, ka pohuar se brenda periudhës trevjeçare projekti parasheh që unioni do të jetë funksional, dhe ka mundësi të jetë praktikë, ngase në mënyrë demokratike do të zgjidhen shoqatat që do aderojnë në këtë union. Bunjaku ka shpjeguar përfitimet që do të kenë fermerët kur të themelohet unioni.

“Do t’i ndihmojë fermerit shumë në ndryshime. Së pari, fermeri do të marrë informata më të sakta më të shpejta nga unioni; së dyti, fermeri ka një adresë nga ku do të njoftohet me ligjin dhe rregullat që do të përgatiten, gjithashtu fermeri do t’i bartë informacionet e veta tek ky union. Fermeri gjithashtu do të marrë informata nga ky union për shitjet dhe blerjet që do të bëhen nga ky union ose nga trupi i këtij unioni, si dhe shërbime të tjera që do të rrjedhin. Shembull shërbime shëndetësore, kontributet pensionale dhe shumë të tjera” ka pohuar ai.

Edhe shoqatat që përfaqësojnë fermerët të sektorëve të ndryshëm kanë pohuar se krijimi i një unioni sjellë pozitivizëm dhe do të jetë pikë lidhëse në mes të shoqatave dhe ministrisë.

Labinot Shehu, kryetar i shoqatës së vreshtarëve në Rahovec ka pohuar se tashmë nuk do të mund gjithkush krye në veti të shkojë të kërkojë takim me ministrin, por ai do jetë i informuar për çdo kërkesë të tyre përmes unionit.

“Fermerët e tanë nuk janë në nivelin qysh duhet me qenë, siç janë ata në regjion, ngurrojnë shumë. Shembull është regjistrimi i fermerëve, sepse ata mendojnë që nëse regjistrohen si fermer duhet të paguajnë taksa, ngase kanë paguar dikur në shtetin komunist dhe për atë arsye nuk dëshirojnë të regjistrohen si fermer”, ka thënë ai.

Ndërsa Ramadan Memaj, kryetar i Shoqatës së Përpunuesve të Qumështit ka pohuar se nëse në union përfshihen njerëz që përfaqësojnë sektorë të ndryshëm, do të ndodh një progres, ngase, sipas tij, deri më tash kanë ekzistuar përvoja jo të mira.

Ky memorandum është në kuadër të projektit “Edukimi dhe Konsolidimi i fermerëve në Kosovë”. /Kosovapress