• Lajmi
  • KosovaPress, 08 Tetor 2012 14:05

Xhamia Qendrore i bashkoi të gjithë (me video)

prev next
 
Të ngjajshëm

Zyrtarët më të lartë të shtetit, pozitë dhe opozitë, krerë të të gjitha feve në vend, si dhe shumë qytetarë i bëri bashkë vënia e gurëthemelit të xhamisë qendrore në Prishtinë. U tha se Prishtinës i ka munguar një xhami e përmasave të tilla, aq më shumë kur dihet se Kosova është shtet multifetar dhe multikulturor. Kosova, sipas zyrtarëve të vendit, është shembull në gjithë botën, për harmonin ndërfetare.

Presidentja e vendit, Atifete Jahjaga ka thënë se Kosova është shtet laik i ndërtuar mbi parimin qytetarë, që garanton çdo të drejtë të secilit individ dhe komunitet, si dhe lirinë fetare.

Por, derisa ajo po fliste disa persona fishkëllenin dhe kishin ngritur pamflete me mbishkrimin “Jahjaga shau Kuranin”. Ata shumë shpejtë i largoi policia duke mos i lënë të shprehnin pakënaqësitë e tyre, derisa presidentja po mbante fjalim. Por, Jahjaga vazhdoi. Tha se Kosova është shtet multifetar.

“Kosova është vend ku kulturat, traditat dhe fetë janë gërshetuar përgjatë shumë shekujve dhe ku bashkëjetesa mes tyre, ka qenë dhe vazhdon të tjerë, virtyt dhe vlerë e saj. Është vend i besimit në njeriun dhe mirësisë mes njerëzve, vend i tolerancës dhe respektit fetar. Ky gërshetim vlerash fetare e kulturore, i ka dhënë Kosovës dhe qytetarëve të saj një vlerë më të madhe, atë të guximit të bashkëjetesës në diversitet”, ka thënë ajo.

Myftiu Naim Tërnava ka thënë se ndërtimi i kësaj xhamie ka qenë nevojë e kamotshme, ngase sipas tij, nëpër kohë janë përdhosur, janë shkatërruar , janë tjetërsuar dhe janë rrënuan shumë faltore të lënë amanet nga të parët.

“Dhe, pikërisht ishin faltoret ato që u dhanë bërthamat e para, u organizua shoqëria. Në to, përveç që është adhuruar e madhëruar Zoti, aty ka filluar edhe edukimi, emancipimi, arsimimi dhe qytetërimi i shoqërisë”, ka thënë ai.

Kreu i Kuvendit, Jakup Krasniqi ka thënë se e drejta e fesë në Kosovë është e garantuar me Kushtetutë.

“Prishtinës ndoshta deri më sot i ka munguar një xhami e këtyre përmasave, për të siguruar hapësirë të mjaftueshme që të gjithë besimtarët të kryejnë në kushte optimale, ritet fetare. Kosova e lirë, e pavarur dhe demokratike po hap rrugë të reja për të gjithë, edhe për kultet fetare. Në Republikën tonë e drejta e fesë është e garantuar me Kushtetutë, prandaj duhet krijuar edhe kushtet e ushtrimit të besimit te qytetarët tanë”, ka thënë ai.

Ndërsa kryeministri i vendit, Hashim Thaçi ka thënë se Kosova edhe pse shtet i ri, është shembull për rajonin dhe tërë botën, për harmonin ndërfetare.

Ndërsa i pari i kryeqytetit, Isa Mustafa ka thënë se gjetja e këtij trolli dhe krijimi i kushteve është puna më e madhe që kanë bërë, ngase sipas tij, do të ndërtohet një monument fetar, i kulturës, i qëndresës dhe i tolerancës.

Ky lokacion është përcaktuar nga Komuna e Prishtinës muaj më parë edhe pse kërkesat ishin që ajo të ndërtohej përballë Institutit Albanologjik.

Lokacioni i ndarë për xhaminë përfshinë një sipërfaqe rreth 78 ari ndërsa kryeimami i Bashkësisë Islame të Kosovës, Sabri Bajgora, ditë më parë ka njoftuar në bashkëpunim me PTK-në, ka hapur një numër të veçantë për thirrje telefonike, e cila kushton 1 euro, mjete të cilat dedikohen për ndërtimin e Xhamisë Qendrore në Prishtinë.