• Lajmi
  • KosovaPress, 07 Mars 2012 13:34

AAK: Sistem arsimor i dobët dhe i politizuar

prev next
 
Të ngjajshëm

Aleanca për Ardhmërinë e Kosovës, me rastin e shënimit të 7 marsit, Ditën së Mësuesit, ka vlerësuar se në Kosovë sistemi i arsimit në Kosovë është i një cilësie tejet të dobët dhe vazhdon të jetë i politizuar nga partia në pushtet. AAK i ka bërë thirrje Qeverisë së Kosovës dhe Ministrisë së Arsimit Shkencës dhe Teknologjisë (MASHT), që të mos e keqpërdorin arsimin për qëllime politike, por të përqendrohet në përmbushjen e objektivave që dalin nga raporti i fundit i Progresit të Komisionit Evropian.

Jonuz Salihaj, kryetar i Departamentit për arsim në AAK, gjatë një konference për media, ka pohuar se shqetësuese mbetet cilësia në arsimin e Kosovës dhe politizimi i sistemit arsimor nga partia në pushtet. Sipas tij, arsimi në Kosovë gjendet para sfidave të mëdha.

“Jemi të brengosur me politizimin e shkollës nga partia në pushtet dhe bëjmë edhe njëherë ftesë publike Qeverisë dhe Ministrisë së Arsimit që mos ta shfrytëzoi arsimin për qëllime politike. E keni edhe në Raportin e Progresit dhe mjaftojnë që ato vërejtje që janë paraqitur në Raportin e Progresit të zbatohen në praktikë dhe arsimi jonë të ecë i harmonishëm me BE-në. Në këtë stad të zhvillimit të sistemit, ne jemi shumë larg sistemit arsimor të vendeve të BE-së, po ashtu edhe shumë lag nga vendet e regjionit. Duhet një punë shumë më e madhe, buxhet dhe motivim më i madh”, ka thënë Salihaj.

Sistemi arsimor, sipas Salihajt, vazhdon të mbetet jo unik dhe se përfshirja në të gjitha segmentet vazhdon të jetë e ulët.

Ai ka thënë se Kosova çdo ditë e më shumë po ballafaqohet me kuadro tejet të dobëta dhe se me gjendjen e dobët në arsim, do të duhej të brengosej çdo qytetar i Kosovës.

“Për fat të keq kemi cilësi të dobët të kuadrove. Cilësia është katastrofale. Kemi aq shumë tituj master, qoftë shkencor, doktoratura, qoftë bechelor, apo grada tjera shkencore, me cilësi aq të dobët sa që është për t’u brengosur. Unë e kuptoj që është një gjendje tranzicioni, por kemi aq shumë devalvim të sistemit dhe të shkollës, aq shumë kemi pasiguri në shkollat tona, saqë është për t’u brengosur. Një shoqëri duhet të brengoset me nivelin e sistemi të arsimit tonë”, ka pohuar Salihaj.

Çështje urgjente për këtë vit shkollor, sipas tij, mbetet realizimi i kalendarit shkollor, duke kompensuar ditët e humbura dhe përgatitjet substanciale për realizimin e vlerësimit të jashtëm, për tri nivelet e arsimit para universitar. Ai po ashtu ka theksuar se edhe pse kanë mbetur më pak se tre muaj, nga realizimi i vlerësimit për maturantët, nuk po shihet ndonjë përgatitje nga MASHT, për ta administruar mirë këtë test. Kompetentët, sipas tij, duhet të reflektojnë për cilësinë e testeve dhe mënyrën e administrimit të procesit të testimit. Para se të realizohet ky proces, ai ka thënë se nevojitet zbatimi i një testi sondazh, i cili do të jepte informata të mjaftueshme për nivelin e testit, në mënyrë që të hartohen teste me karakteristika standarde dhe instrumente matëse të besueshme.

Objektivat afatshkurtra që duhej të realizohen para se të fillojë viti i ri shkollorë, sipas AAK-së, janë, hartimi i një kalendari më efektiv shkollor, korrigjimi i rrjetit të shkollave të nivelit 3, sidomos atyre profesionale, monitorimi i të gjitha shkollave të nivelit para universitar nga inspektorati shkollor, vlerësimi kritik i plan programeve, vlerësimi i teksteve aktuale shkollore dhe vlerësimi i cilësisë së Institucioneve të Arsimit të lartë, që përgatisin kuadro për arsim dhe mbi të gjitha Unifikim të sistemit Arsimor. /Kosovapress/