EULEX sjell kopjet e regjistrave civilë nga Nishi

Prishtinë, (Kosovapress) 27 Korrik 2012 20:07

Në dy ditët e fundit EULEX-i ka certifikuar 94 kopje të librave origjinale të regjistrave të Kosovës për lindjet, vdekjet dhe martesat që e mbulojnë territorin e Janjevës dhe Babushit të Muhaxherëve, Komuna e Lipjanit, thuhet në komunikatën EULEX-it të lëshuar për media. Certifikimi i kopjeve të gjitha librave ekzistues origjinalë të regjistrit civil që gjenden në Serbi do t’i mundësojë Kosovës t’i ketë të dhënat e duhura dhe cilësore të regjistrit civil të nevojshme për krijimin e të dhënave të besueshme të regjistrave civil/popullatës.

Në këtë komunikatë gjithashtu thuhet se përmes projektit të EULEX-it janë certifikuar gjithsej 218 kopje të librave të regjistrit civil dhe fetar të lindjeve, martesave dhe vdekjeve për territorin e Janjevës dhe Babushit të Muhaxherëve, Komuna e Lipjanit. Nga gjithsej 218 kopje, 124 janë për territorin e Janjevës në Komunën e Lipjanit. Në këtë projekt të vogël janë angazhuar nëntë persona prej të cilëve gjashtë janë studentë serbë.

Së shpejti do të realizohet një projekt më i madh që e përfshin EULEX-in, Përfaqësuesin Special të BE-së dhe Këshillin Danez për Refugjatë për t’i riprodhuar kopjet e të gjithë librave/regjistrave civil origjinal të Kosovës që aktualisht gjenden në Serbi. Numri i këtyre librave vlerësohet të jetë rreth 12,036. Kopjet e certifikuara të regjistrave origjinal janë pjesë e marrëveshjeve të arritura më 2 korrik 2012 në mes të Prishtinës dhe Beogradit në kuadër të dialogut të lehtësuar nga BE-ja. Thuhet ndër të tjera në komunikatën e EULEX-it.