Iniciohen hetimet për keqpërdorimet në UP

Prishtinë, (Kosovapress) 04 Qershor 2012 19:26

Pas zhvillimeve aktuale rreth Universitetit të Prishtinës, Këshillit Drejtues i këtij institucioni në mbledhjen e mbajtur pas dite ka vendosur që të formojnë një komision hetimor lidhur me procedurën dhe vërtetësinë e mirënjohjes së marrë nga Samitin e Cilësisë, por edhe për qartësimin e keqpërdorimeve të mundshme gjatë vizitës në SHBA.

Lajmin e bëri të ditur anëtari i këshillit drejtues, Milazim Krasniqi, i cili ka thënë për KosovaPress se ky komision ka për detyrë që brenda një jave t’i paraqes raport këshillit drejtues lidhur me këto çështje.

Kurse, sa i përket shkrimeve të fundit lidhur me keqpërdorimet e mundshme në UP, Krasniqi thotë se anëtarët e këshillit kanë diskutuar me tone shumë kritike ndaj punës së menaxhmentit të cilat kanë rezultuar me vendimine për hetime, i cili hap rrugë qartësimit të keqpërdorimeve eventuale që mund të ketë pasur gjatë udhëtimit për në Shtetet e Bashkuara të Amerikës.

Po ashtu, meqenëse është faza e zgjedhjeve dhe fundi i mandatit të menaxhmentit, sipas tij, Këshilli Drejtues ka marrë vendim t’i ndalojë të gjitha konkurset për pranim të punëtorëve të rinj, pastaj ka ndaluar edhe të gjitha udhëtimet jashtë shtetit, por edhe investimet në UP.

Ndryshe, menaxhmenti i UP-së është akuzuar se ka blerë çmimin e medaljes së artë, të dhënë nga Senati i Cilësisë në SHBA, por gjithashtu edhe me keqpërdorime të mjeteve të UP-së gjatë kësaj vizite, gjë të cilën kategorikisht e ka hedhur poshtë menaxhmenti i UP-së, duke thënë se janë shpifje të mediave dhe organizatave studentore. /Kosovapress/