Vazhdojnë punët riparuese në Zhilivodë

Prishtinë, (Kosovapress) 18 Korrik 2012 14:32

Ekspertët e mjekësisë ligjore të EULEX-it nga Departamenti i Mjekësisë Ligjore në bashkërendim me Forcën e Sigurisë së Kosovës (FSK) po vazhdojnë punët riparuese në Zhilivodë, bëhet e ditur nga zyra për informim e EULEX-it.

Sipas tyre, dheu i depozituar në sipërfaqe që u kaplua nga zjarri gradualisht është duke u mënjanuar. “Akoma ka thëngjill që po tymon. Në momentin kur dheu i deponuar të jetë mënjanuar në tërësi, hulumtimet për varrezë masive do të rifillojnë, sipas të gjitha gjasave kjo do të ndodhë gjatë javës që vjen”, thuhet në njoftimin e kësaj zyre, e cila shton se hetimet për shkakun e zjarrit po vazhdojnë.