Nis festivali "Shqip Film Fest"

Pejë, (Kosovapress) 25 Qershor 2012 16:08

Sot janë ngritur perdet për fillimin e festivalit tashmë tradicional të filmit të metrazhit të shkurtër që mbahet në Pejë "Shqip Film Fest". Me moton “Të gjithë kanë nga një rrëfim”, këtë fit nis festivali, i cili për dallim nga vitet e kaluara natën e parë do ta zhvillojë nën qiellin e hapur në fshatin Rekë e Allagës në Rugovë.

Naser Rafuna drejtor i këtij festivali ka thënë se edhe këtë vit do të ketë mjaft risi në festival, ku publiku kosovar do të ketë mundësinë të njihet me kultura dhe filma që vijnë nga shumë vende të botës.

"Ne jemi të lumtur që po i sjellim publikut tonë në këto ditë me vapë pak relaksim dhe në festivalin Shqip Film Fest, tashmë me karakter ndërkombëtar, do të zbarkojnë filma nga shumë vende të botës, dhe publiku kosovar do të ketë rastin të njihet me kulturën dhe artin e shumë shteteve", ka thënë Rafuna, i cili më tej ka falënderuar të gjithë ata që kanë përkrahur mbajtjen e këtij festivali tashmë të njohur ndërkombëtar, ku do të shfaqen filma të metrazhit të shkurtër nga shumë vende të botës./A.Ukaj/