Akreditohen 9 institucione të arsimit dhe aftësimit profesional

Prishtinë, (Kosovapress) 12 Qershor 2012 15:55

Autoriteti Kombëtar i Kualifikimeve, të martën ka akredituar 9 institucione që ofrojnë trajnime profesionale, të cilat kishin plotësuar kriteret për ofrimin e këtyre shërbimeve. Me këtë rast, këtyre institucioneve u janë shpërndarë certifikata akreditimit për ofruesit e arsimit dhe aftësimit profesional. Institucionet që janë pajisur me akreditim janë Qendrat Rajonale për Aftësim Profesional në Pejë, Gjilan, Prishtinë, Gjakovë, Mitrovicë, pastaj Qendra Rajonale për Aftësim Profesional në Prizren, Ferizaj, si dhe Qendra Sociale Edukative “Don Basko” dhe Qendra e Trajnimit në KEK.

Ragip Gjoshi, kryetari i Këshillit Drejtues të Autoriteti Kombëtar të Kualifikimeve, ka theksuar se autoriteti ka bërë punë të madhe gjatë periudhës së procesit të akreditimit. Ai shpreson se me anë të akreditimit krijohet besueshmëri më e madhe e kualifikimeve dhe hapet porta që këto kualifikime të jenë më të vlefshme në shtetet e BE-së. /Kosovapress/

I pranishëm në ceremoninë e shpërndarjes së certifikatave të akreditimit ishte edhe ministri i Arsimit, Ramë Buja, i cili duke uruar institucionet të cilat janë akredituar, ka premtuar para të pranishmeve, se përkrahja e Ministrisë së Arsimit, nuk do të mungoj në realizimin e këtyre projekteve, të cilat i vlerësoi si të rëndësishme për arsimin dhe aftësimin profesional.

“Kjo është nisma dhe do të vazhdojmë me të tjera. Nuk dua t’i hy historikut se kur u krijua autoriteti, por them se kjo detyrë kjo punë, ky angazhim do të vazhdoj në mbështetje institucionale dhe unë uroj për suksese për të arriturat dhe për sukseset”, ka thënë Buja

Kurse, Ragip Gjoshi, kryetari i Këshillit Drejtues të Autoriteti Kombëtar të Kualifikimeve, ka theksuar se autoriteti ka bërë punë të madhe gjatë periudhës së procesit të akreditimit. Ai shpreson se me anë të akreditimit krijohet besueshmëri më e madhe e kualifikimeve dhe hapet porta që këto kualifikime të jenë më të vlefshme në shtetet e BE-së.

“Në shkurt të këtij viti, Autoriteti i ka bërë ftesë publike të gjitha institucioneve të arsimit që ofrojnë kualifikime të arsimit dhe aftësimit profesional. Në një konkurs publik ku janë paraqitur gjithsejtë 9 institucione për akreditimin e dy profileve dhe nga këto nën institucione, 4 prej tyre kanë konkurruar me akreditim dhe hulumtim me nga dy profesione. Ndërsa, pesë të tjera ishin vetëm për njërin profesion. Me këtë rast, është hera e parë që autoriteti i ka hyrë këtij procesi të akreditimit dhe do të vazhdojmë siç kemi marrë vendimin e fundit si këshill drejtues për vazhdimin e këtij procesit të akreditimit”, ka thënë Gjoshi.

Në fund u shpërndan edhe certifikata për përfaqësuesit e institucioneve të akredituara për një periudhe 3 vjeçare.

Përndryshe, Autoriteti Kombëtar i Konkurrencës është themeluar në vitin 2009, me Ligjin për kualifikime kombëtare. Roli dhe përgjegjësia e AKK-së është zhvillimi dhe menaxhimi i Kornizës kombëtare të Kualifikimeve. Korniza Kombëtare e Kualifikimeve është përgatitur nga Autoriteti Kombëtar i kualifikimeve me mbështetjen e projektit EU Kosovë V dhe financuar nga Bashkimi Evropian. /Kosovapress/