Hetimi i EULEX, antikushtetues

Tiranë, (Kosovapress) 12 Maj 2012 16:56

Për ish-Prokurorin e Përgjithshëm të Shqipërisë, Arben Rakipi, ligji për lejimin e hetimeve të EULEX-it në Shqipëri, për të verifikuar akuzat e Dick Marty-t, ka zgjidhur vetëm një situatë politike, për kompetencat dhe privilegjet që i ka dhënë një autoriteti të huaj.

"Mbase është menduar të rregullohet me Konventën e Vjenës, për dhënien ose njohjen e imuniteteve, por gjykoj që një autoritet juridik, qoftë edhe e EULEX-it, nuk ka një arsye të besueshme përse duhet të gëzojë një imunitet diplomatik. Duket sikur paragjykohet një situatë, kur atyre u nevojitet një mbrojtje e tillë", thotë Rakipi për Top Channel duke shtuar se i vetmi instrument, që mund t'i drejtohet Gjykatës Kushtetuese për shfuqizim do të jenë vetëm ata që do t'i nënshtrohen këtij ligji ose vetë gjykatat që do të procedojnë me të.

Rakipi shprehet se u demonstrua i gjithë vullneti i duhur, për t'i dhënë atë të drejtë, që shqiptarëve nuk i është dhënë asnjëherë.

"Them se ka zgjidhur situatë politike, duke e marrë në tërësi, si tek kompetencat, privilegjet, mënyrën e komunikimit të autoritetit të huaj, ashtu deri tek një mungesë totale reciprociteti, kur vjen fjala për situata të ngjashme, të cilat shqiptarët mund t'i kenë patur në jetët ose kurrizin e tyre. Gjëmat që ata kanë vuajtur gjatë këtyre viteve dhe kërkush nuk është kujdesur që të bëjë një ligj të ngjashëm, në mënyrë që t'i lejojë shqiptarëve për të verifikuar çfarë ka ngjarë me ta", thotë Rakipi.

Për ekspertin e jurisprudences, shume dispozita të këtij ligji do të krijojnë një ngerç juridik, pasi janë edhe pjesë e Kodit të Procedurës Penale dhe nga pikëpamja juridike ky kod në vend, është një ligj hierarkik më i lartë.

"Në këtë pikëpamje shihen dispozita të këtij ligji, të cilat vihen në dyshim lidhur me aplikueshmërinë e tyre, përsa kohë ligji në pikëpamjen e hierarkike më të lartë i rregullon gjërat ndryshe. Kështu që kush ka të bëjë me këtë ligj nesër, kur ai do të nisë të aplikohet, ose kushdo që mund t'i nënshtrohet këtij ligji si dëshmitar, do të verë në pikëpyetje faktin se cilën dispozitë juridike të zbatojë, këtë që po flasim bashkë, apo elementët që janë të përshkruara hollësisht në Kodin e Procedurës, që nga pikëpamja hierarkike është ligj më i lartë", tha Rakipi.

Për ish-drejtuesin e akuzës shqiptare, dhënia e të drejtës së arrestimit një organi të huaj është shqetësim akoma edhe më i madh.

"Është një shqetësim i madh që ka të bëjë me autoritetin e institucioneve tona, nëse ato do të vazhdojnë të aplikojnë sovranitetin, që u është ngarkuar për të aplikuar, kur vjen fjala për ndihmën juridike të ndërsjellë, apo do të lejojnë kolegë të tjerë që vijnë nga një juridiksion tjetër dhe manovrojnë, sipas procedurave të tyre në vend. Kjo e dyta është e palejueshme", tha Rakipi.

Dhënia e imunitetit diplomatik EULEX-it është një paragjykim për Arben Rakipin, se këtij organi mund t'i ndodhe diçka ne Shqipëri, duke shprehur qartë kundërshtinë e tij për nenin 14 të këtij ligji.

Ish-prokurori e mbyll intervistën e dhënë, duke sqaruar se politika ishte kompakte në vend, në momentin më të papërshtatshëm dhe se i vetmi instrument, që mund t'i drejtohet Gjykatës Kushtetuese për shfuqizim do të jenë vetëm ata që do t'i nënshtrohen këtij ligji ose vetë gjykatat që do të procedojnë me të.